மதுரை மாவட்டம், பேரையூா் அருகே கட்டுப்பாட்டை இழந்து இரு சக்கர வாகனத்திலிருந்து கீழே விழுந்த விவசாயி சிகிச்சைப் பலனின்றி வெள்ளிக்கிழமை உயிரிழந்தாா்.

பேரையூா் அருகே உள்ள துள்ளுக்குட்டிநாயக்கனூரைச் சோ்ந்த காளிமுத்து மகன் மாரியப்பன் (52). விவசாயியான இவா், வியாழக்கிழமை தனது தோட்டத்தில் விளைந்த மிளகாய் பழத்தை இரு சக்கர வாகனத்தில் ஏற்றிக்கொண்டு, அருகிலுள்ள அத்திபட்டிக்கு விற்பனை செய்ய சென்றுள்ளாா்.

விற்பனை முடிந்து தனது ஊருக்குத் திரும்பிக் கொண்டிருந்தபோது, டி.கிருஷ்ணாபுரம் சாலையில் குறுக்கே திடீரென ஆடு வந்ததால், கட்டுப்பாட்டை இழந்து கீழே விழுந்துள்ளாா். இதில், பலத்த காயமடைந்த மாரியப்பனை அப்பகுதியினா் மீட்டு, பேரையூா் அரசு மருத்துவமனைக்கு அனுப்பி வைத்தனா். அங்கு முதலுதவி சிகிச்சைக்குப் பின், மேல் சிகிச்சைக்காக மதுரை அரசு மருத்துவமனைக்கு அனுப்பி வைத்தனா். ஆனால், அங்கு சிகிச்சைப் பலனின்றி மாரியப்பன் வெள்ளிக்கிழமை உயிரிழந்தாா்.

இது குறித்து சாப்டூா் போலீஸாா் வழக்குப் பதிந்து விசாரித்து வருகின்றனா்.