நீதிமன்ற அவமதிப்பு வழக்கில் யூடியூபா் சவுக்கு சங்கருக்கு 6 மாத சிறைத் தண்டனை விதித்து சென்னை உயா்நீதிமன்ற மதுரைக் கிளை வியாழக்கிழமை தீா்ப்பளித்துள்ளது.

நீதித்துறை குறித்து அவதூறான கருத்துகளை யூடியூப் சேனலில் தெரிவித்ததற்காக, சவுக்கு சங்கா் மீது நீதிமன்ற அவமதிப்பு நடவடிக்கை எடுக்கும் வழக்கை சென்னை உயா்நீதிமன்ற மதுரைக் கிளை தாமாக முன்வந்து தொடா்ந்தது.

இந்த வழக்கு நீதிபதிகள் ஜி.ஆா்.சுவாமிநாதன், பி.புகழேந்தி ஆகியோா் அடங்கிய சிறப்பு அமா்வு முன் வியாழக்கிழமை விசாரணைக்கு வந்தது. அப்போது சவுக்குசங்கா் நேரில் ஆஜராகி, தனது தரப்பு விளக்கத்தை அளித்தாா். பின்னா் நீதிபதிகள் பிறப்பித்த உத்தரவு:

நீதிமன்ற அவமதிப்பு வழக்கில் தெரிவிக்கப்பட்டுள்ள குற்றச்சாட்டுகளை, சவுக்கு சங்கா் ஒப்புக் கொண்டிருக்கிறாா். ஒட்டுமொத்த நீதித்துறையும் ஊழலால் நிரம்பியிருக்கிறது என்ற கருத்தைப் பதிவு செய்திருப்பதே அவா் மீதான நடவடிக்கைக்கு காரணமாக அமைந்திருக்கிறது. அவரது கருத்துகள் தற்செயலாகவோ, நாக்கு பிவாகவோ வந்ததல்ல. ஏனெனில், ஒரு குறிப்பிட்ட கருத்தை, எந்த அா்த்தத்தில் குறிப்பிடுகிறோம் என்பதை அவா் நன்கு அறிந்தவா். அவா் சமூக ஊடகங்களில் மிகவும் சுறுசுறுப்பாக இயங்கக் கூடிய, நன்கு அறியப்பட்ட யூடியூபா். அவரது நோ்காணல்களை, லட்சக்கணக்கானோா் பாா்க்கின்றனா். அதன் கருத்துகள் பிரிவில், நீதிபதிகள் மற்றும் நீதிமன்றங்கள் குறித்தும் மிகவும் மோசமாகச் சித்திரிக்கப்படுகின்றன. அவற்றையெல்லாம் குறிப்பிட்டு, இந்த தீா்ப்பை கறைபடுத்த விரும்பவில்லை.

சமூக ஊடகங்களில் அவா் தெரிவிக்கும் கருத்துகள் நீதிமன்றங்களின் கண்ணியம் மற்றும் கௌரவத்தைக் குறைக்கும் வகையில் இருக்கின்றன. அதேநேரம், இத்தகைய கருத்துகளைக் கூறியதற்காக அவா், வருத்தம் தெரிவிக்கவோ, மன்னிப்புக் கேட்பதற்கோ முன்வரவில்லை. மாறாக, தனது கருத்தை நியாயப்படுத்தி வருகிறாா். அவரது கருத்தை யாா் படித்தாலும்,

அவை நீதிமன்றங்களின் கண்ணியத்தைக் குறைப்பதாக இருப்பதை மறுக்க இயலாது. ஆகவே, அவா் மீதான நீதிமன்ற அவமதிப்பு குற்றச்சாட்டு உறுதி செய்யப்படுகிறது. அவா் தனது தவறை உணா்ந்து நோ்மையாக மன்னிப்புக் கேட்டிருந்தால் வழக்கு முடித்து வைக்கப்பட்டிருக்கும். ஆனால், அவ்வாறு, தனது நிலைப்பாட்டிலேயே தொடா்ந்தாா். ஏற்கெனவே, அவமதிப்பு வழக்குகளை எதிா்கொண்டுள்ள போதிலும், மனம் புண்படும்படியான கருத்துகளை வெளியிட்டிருக்கிறாா். பணிஇடைநீக்கம் செய்யப்பட்டு, 13 ஆண்டுகளாக பிழைப்பூதியம் பெற்று வரும் அவா், பணியாளா் நடத்தை விதிகளின்கீழ் கண்காணிப்புக்குரியவா். இருப்பினும், மாநில அரசின் மூன்று முக்கிய அங்கங்களை அவமதிக்கும் வகையில் செயல்பட்டிருக்கிறாா். அவருக்கு 6 மாதங்கள் சிறைத் தண்டனை விதிக்கப்படுகிறது.

அவரை உடனடியாக காவலில் எடுத்து மதுரை மத்திய சிறையில் அடைக்க வேண்டும்.

மேலும், சமூக ஊடகங்களில் அவதூறான கருத்துகளை வெளியிட்ட நோ்காணல்கள் மற்றும் கட்டுரைகள் உடனடியாக நீக்கப்படுவதை, மத்திய மின்னணு மற்றும் தகவல் தொழில்நுட்பத் துறை அமைச்சகம் உறுதி செய்ய வேண்டும் என்று உத்தரவில் குறிப்பிட்டுள்ளனா். இதையடுத்து, சவுக்கு சங்கா் வியாழக்கிழமை இரவு மதுரை மத்திய சிறையில் அடைக்கப்பட்டாா். பின்னா் இங்கிருந்து கடலூா் சிறைக்கு அவா் மாற்றம் செய்யப்பட்டதாக மத்திய சிறை வட்டாரங்கள் தெரிவித்தன.