அலங்காநல்லூா் அருகே தனியாா் ஆலை மேற்பாா்வையாளா் கழுத்து அறுத்துக் கொலை செய்யப்பட்டுள்ளாா்.

மதுரை மாவட்டம் அலங்காநல்லூா் அருகே உள்ள கம்மாபட்டியைச் சோ்ந்த கா்ணனின் மகன் பொன்னுமணி (25). இவா் தனிச்சியம் பகுதியில் உள்ள ஒரு தனியாா் ஆலையில் மேற்பாா்வையாளராகப் பணியாற்றி வந்தாா். இவருக்கு கடந்த 9 மாதங்களுக்கு முன்பு திருமணம் நடைபெற்றது.

வழக்கம்போல வெள்ளிக்கிழமை பணிக்குச் சென்ற பொன்னுமணி, இரவு நீண்டநேரம் ஆகியும் வீடு திரும்பவில்லை. அவரது கைப்பேசியில் அழைத்தபோதும், தொடா்பு கொள்ளமுடியவில்லை. அவரது குடும்பத்தினா் பல இடங்களில் தேடியும் அவரைக் கண்டுபிடிக்க முடியவில்லை.

இதனிடையே, கம்மாபட்டி அருகே கழுத்து அறுபட்ட நிலையில், பொன்னுமணி இறந்து கிடந்தது தெரியவந்தது. இதுகுறித்து போலீஸாருக்குத் தகவல் தெரிவிக்கப்பட்டது. சம்பவ இடத்துக்கு வந்த அலங்காநல்லூா் போலீஸாா் விசாரணை நடத்தினா். மாவட்டக் காவல் கண்காணிப்பாளா் சிவபிரசாத், சமயநல்லூா் டிஎஸ்பி பாலசுந்தரம் ஆகியோா் சம்பவ இடத்தைப் பாா்வையிட்டு விசாரணையைத் துரிதப்படுத்தினா். பின்னா் பொன்னுமணியின் சடலத்தை மீட்ட போலீஸாா் உடல் கூறாய்வுக்காக மதுரை அரசு ராஜாஜி மருத்துவமனைக்கு அனுப்பினா்.

கடந்த சில நாள்களுக்கு முன்பு நடந்த திருவிழாவின்போது, பொன்னுமணி மற்றும் அவரது சகோதரா் தரப்புக்கும் அதே ஊரைச் சோ்ந்த மற்றொரு தரப்புக்கும் தகராறு ஏற்பட்டுள்ளது. இந்த முன்விரோதத்தில் பொன்னுமணி கொலை செய்யப்பட்டிருக்கலாம் எனச் சந்தேகிக்கப்படுகிறது.

இதுதொடா்பாக கா்ணன் அளித்த புகாரின்பேரில் அலங்காநல்லூா் போலீஸாா் வழக்குப்பதிவு செய்து விசாரித்து வருகின்றனா்.