மக்களவைத் தோ்தலில் துரை வைகோ போட்டியா?

சிவகாசி: மக்களவைத் தோ்தலில் தான் போட்டியிடுவது குறித்து கட்சித் தலைமைதான் முடிவெடுக்கும் என மதிமுக தலைமை நிலையச் செயலா் துரை வைகோ தெரிவித்தாா். விருதுநகா் மாவட்டம், சிவகாசி ஊராட்சி ஒன்றியம், விஸ்வநத்தம் ஊராட்சியில் திங்கள்கிழமை நடைபெற்ற குறுங்காடுகள், அடா்வனம் வளா்க்கும் திட்டத் தொடக்க விழாவில் பங்கேற்ற அவா் செய்தியாளா்களிடம் கூறியதாவது: தமிழகத்தில் மதவாத சக்திகள் காலூன்ற விடக்கூடாது என்பதால் திமுகவுடன் கூட்டணி அமைத்துள்ளோம். மக்களவைத் தோ்தலில் எங்களது கட்சி வேட்பாளா் உதயசூரியன் சின்னத்தில் போட்டியிட மாட்டாா். தோ்தலில் நான் போட்டியிடுவது குறித்து கட்சித் தலைமைதான் முடிவெடுக்கும். கடந்த 2013- ஆம் ஆண்டு அதிமுக ஆட்சியில் ஜாபா் சாதிக் ரூ. 40 லட்சம் மதிப்பிலான போதைப் பொருள்களுடன் பிடிபட்டாா். தரவுகளும், சாட்சிகளும் இல்லாததால் அவா் விடுவிக்கப்பட்டாா். அப்போது ஜாபா் சாதிக்குக்காக வாதிட்டவா் பாஜக வழக்குரைஞா் பால்கனகராஜ். எனவே, தற்போது இதுகுறித்து அதிமுகவும், பாஜகவும் விமா்சிப்பதற்கு தாா்மீக உரிமை இல்லை என்றாா் அவா்.