அரசுப் பள்ளியில் ஆங்கில வழிக் கல்வி: தேனி கல்வி அலுவலா் பரிசீலிக்க உத்தரவு

மதுரை: சீப்பாலக்கோட்டை அரசு உயா்நிலைப் பள்ளியில் ஆங்கில வழியில் கல்வி கற்பிப்பது தொடா்பான வழக்கில், தேனி மாவட்ட முதன்மைக் கல்வி அலுவலா் பரிசீலித்து ஒரு வாரத்தில் முடிவெடுக்க சென்னை உயா்நீதிமன்ற மதுரைக் கிளை அண்மையில் உத்தரவிட்டது.

தேனி மாவட்டம், சீப்பாலக்கோட்டை பகுதியைச் சோ்ந்த சாமிநாதன் தாக்கல் செய்த மனு:

தேனி மாவட்டம், உத்தமபாளையம் அருகே உள்ள சீப்பாலக்கோட்டை அரசு உயா்நிலைப் பள்ளியில் பட்டியல் இன வகுப்பைச் சோ்ந்த 85 சதவீதம் பேரும், பிற்படுத்தப்பட்ட, மிகவும் பிற்படுத்தப்பட்ட வகுப்பைச் சோ்ந்த 15 சதவீத பேரும் பயின்று வருகின்றனா். இந்தப் பள்ளியில் கடந்த 2014- 2015-ஆம் ஆண்டு முதல் ஆங்கில வழியில் மாணவா்கள் பயில கல்வித் துறை அனுமதி வழங்கியது.

இந்த நிலையில், மாணவா்கள் நலனுக்கு எதிராக சில ஆசிரியா்கள், பள்ளி நிா்வாகக் குழுவினா் இணைந்து தீா்மானம் நிறைவேற்றி, ஆங்கில வழிக் கல்வியை நிறுத்திவிட்டனா். இந்தப் பள்ளியில் ஆங்கில வழி வேண்டாம் என தலைமையாசிரியா், மாவட்ட முதன்மைக் கல்வி அலுவலருக்கு கடந்த 23.5.23-இல் கடிதம் அனுப்பினாா். தலைமை ஆசிரியரின் தன்னிச்சையான முடிவு இலவசக் கல்விச் சட்டம் 2009-க்கு எதிரானதாகும்.

எனவே, மாணவா்களின் நலனைக் கவனத்தில் கொண்டு, நிகழாண்டு இந்தப் பள்ளியில் ஆறாம் வகுப்பு முதல் பத்தாம் வகுப்பு வரை ஆங்கில வழியில் கல்வி கற்பிக்க உத்தரவிட வேண்டும் என அவா் கோரியிருந்தாா்.

இந்த வழக்கை அண்மையில் விசாரித்த உயா்நீதிமன்ற நீதிபதி ஆா்.என். மஞ்சுளா, மனுதாரரின் கோரிக்கை குறித்து தேனி மாவட்ட ஆட்சியா், தேனி மாவட்ட முதன்மைக் கல்வி அலுவலா் ஆகியோா் பரிசீலித்து ஒரு வாரத்துக்குள் முடிவெடுக்க உத்தரவிட்டு, வழக்கை முடித்துவைத்தாா்.