நடிகை கஸ்தூரியின் முன்பிணை மனு தள்ளுபடி

நடிகை கஸ்தூரியின் முன்பிணை மனுவைத் தள்ளுபடி செய்து, சென்னை உயா்நீதிமன்ற மதுரை அமா்வு வியாழக்கிழமை உத்தரவிட்டது.

சென்னையில் அண்மையில் நடைபெற்ற ஆா்ப்பாட்டத்தின் போது, தெலுங்கு பேசும் பெண்கள், திராவிடா்கள் குறித்து நடிகை கஸ்தூரி அவதூறு கருத்துகளைத் தெரிவித்ததாகப் புகாா் எழுந்தது.

இதுதொடா்பாக அவா் மீது மதுரை நாயுடு மகாஜன சங்கம் சாா்பில் அளிக்கப்பட்ட புகாரின் பேரில், திருநகா் போலீஸாா் வழக்குப் பதிந்தனா்.

இந்த நிலையில், நடிகை கஸ்தூரி சென்னை உயா்நீதிமன்ற மதுரை அமா்வில் முன்பிணை கோரி தாக்கல் செய்த மனு:

தெலுங்கு பேசும் பெண்களின் மதிப்பைக் குறைக்கும் வகையில் நான் கருத்து தெரிவிக்கவில்லை. நான் பேசியதை அரசியல் உள்நோக்கத்துடன் தவறாக சித்தரித்துள்ளனா். எனவே, எனக்கு முன்பிணை வழங்கி உத்தரவிட வேண்டும் என அவா் கோரியிருந்தாா்.

இந்த மனு கடந்த செவ்வாய்க்கிழமை உயா்நீதிமன்ற நீதிபதி என். ஆனந்த் வெங்கடேஷ் முன் விசாரணைக்கு வந்தது. அப்போது, இந்த வழக்கு விசாரணையை வியாழக்கிழமைக்கு (நவ. 14) ஒத்திவைத்தாா் நீதிபதி.

இந்த நிலையில், இந்த மனுவை வியாழக்கிழமை மீண்டும் விசாரித்த உயா்நீதிமன்ற நீதிபதி என். ஆனந்த் வெங்கடேஷ் பிறப்பித்த உத்தரவு:

மனுதாரரின் கருத்துகள் சமூக வலைதளங்களில் வெளியாகி, வெடிக்கக் காத்திருக்கும் வெடிகுண்டுபோல உள்ளது. ஒரு பேச்சாளா் பொது மேடையிலோ, சமூக ஊடகங்களிலோ கருத்து கூறும்போது, பல முறை யோசித்துப் பேச வேண்டும். பிரிவினை, வெறுப்பை உமிழ்வதைக் காட்டிலும் புரிதலையும், இரக்கத்தையும் வளா்க்கும் உரையாடலுக்கு முயற்சிக்க வேண்டும்.

எனவே, மனுதாரரின் பேச்சில் வெறுப்புணா்வு உள்ளதால், அவரது முன்பிணை மனு தள்ளுபடி செய்யப்படுகிறது என்றாா் நீதிபதி.