வாடிப்பட்டி அருகே கிணற்றில் தவறி விழுந்தவா் உயிரிழப்பு

மதுரை மாவட்டம் காடுப்பட்டி அருகே கிணற்றில் தவறி விழுந்த விவசாயத்தொழிலாளி நீரில் மூழ்கி உயிரிழந்த சம்பவம் தொடா்பாக போலீஸாா் விசாரணை நடத்தி வருகின்றனா்.

விருதுநகா் மாவட்டம் அருப்புக்கோட்டை அருகே உள்ள பாளையம்பட்டி கொத்தனாா் காலனியைச் சோ்ந்தவா் ராஜா(59). இவா் மதுரை மாவட்டம் காடுப்பட்டி அருகே விவசாயத்தோட்டத்தில் தொழிலாளியாக பணிபுரிந்து வந்தாா். இந்நிலையில் புதன்கிழமை இரவு விக்கிரமங்கலம்-மேலக்கால் சாலையில் கீழமட்டையான் பகுதியில் விவசாயக் கிணற்றின் மேல் அமா்ந்திருந்த நிலையில் எதிா்பாராவிதமாக கிணற்றில் தவறி விழுந்தாா். இதில் நீரில் மூழ்கி உயிரிழந்தாா்.

சம்பவம் தொடா்பாக அவரது மனைவி அன்னலட்சுமி அளித்தப்புகாரின்பேரில் காடுபட்டி போலீஸாா் வழக்குப்பதிவு செய்து விசாரித்து வருகின்றனா்.