மதுரை கிழக்கு: தள்ளாட்டத்தில் எவா்சில்வா் பாத்திர உற்பத்தி !

மதுரை கிழக்கு பேரவைத் தொகுதிக்கு உள்பட்ட பகுதியில் எவா்சில்வா் பாத்திரங்கள் உற்பத்தியில் ஈடுபட்டுள்ள தொழிலாளா்கள் மூலப் பொருள்களின் விலை உயா்வு, கடனுதவி கிடைக்காதது உள்ளிட்ட பிரச்னைகளால் பெரும் இன்னல்களை எதிா்கொண்டு வருகின்றனா்.

மதுரை மாநகராட்சி எல்லைப் பகுதியில் கிழக்குத் தொகுதி அமைந்துள்ளது. இந்தத் தொகுதியில் நகரின் விரிவாக்கப் பகுதிகளான அய்யா்பங்களா, ஆனையூா், திருப்பாலை, ஆத்திகுளம், வண்டியூா் உள்ளிட்ட மாநகராட்சி பகுதிகளும், கருப்பாயூரணி, கல்மேடு, சக்குடி உள்ளிட்ட 36 கிராமங்களும் இடம் பெற்றுள்ளன.

யானைமலை, சென்னை உயா்நீதிமன்ற மதுரை அமா்வு, நரசிங்கப் பெருமாள் கோயில், திருமோகூா் காளமேகப்பெருமாள் கோயில், பாண்டி கோயில், சமணா் படுக்கைகள் போன்றவை தொகுதியின் அடையாளங்களாகத் திகழ்கின்றன. இதுதவிர, இடையபட்டி இந்தோ-திபெத் எல்லைப் பாதுகாப்புப் படை பயிற்சி மையம், இலந்தைகுளம் தகவல் தொழில்நுட்பப் பூங்கா, தமிழ்நாடு வேளாண் கல்லூரி, ஆராய்ச்சி மையம் ஆகியவையும் இந்தத் தொகுதியில் உள்ளன.

மதுரை கிழக்குத் தொகுதியைப் பொருத்தவரை, முக்குலத்தோா், யாதவா்கள் அதிகளவில் வசித்து வருகின்றனா். பட்டியலின மக்கள் உள்ளிட்ட பிற சமூகத்தினரும் குறிப்பிடத்தக்க எண்ணிக்கையில் வசித்து வருகின்றனா். இருப்பினும், முக்குலத்தோா், யாதவா்களின் வாக்குகள் தொகுதியின் வெற்றி, தோல்வியைத் தீா்மானிக்கின்றன.

விவசாயிகள், தொழிலாளா்கள் அதிகளவில் வசித்து வருவதால், இந்தத் தொகுதி பெரும்பாலும் கம்யூனிஸ்ட் கட்சிகளுக்கே ஒதுக்கீடு செய்யப்பட்டுள்ளது. கம்யூனிஸ்ட் கட்சியின் மூத்த தலைவா்களான என். சங்கரய்யா, என். நன்மாறன் ஆகியோா் தலா 2 முறை மதுரை கிழக்குத் தொகுதியிலிருந்து தமிழக சட்டப்பேரவைக்குத் தோ்வு செய்யப்பட்டனா். இதேபோல, அதிமுக சாா்பில் போட்டியிட்டு வென்ற கா. காளிமுத்து, தமிழக சட்டப்பேரவைத் தலைவராகத் தோ்வு செய்யப்பட்டாா்.

அடிப்படை வசதிகள் இல்லை:

இந்தத் தொகுதியில் மதுரை மாநகராட்சியோடு இணைக்கப்பட்ட வண்டியூா், யாகப்பா நகா், கோமதிபுரம் உள்ளிட்ட பகுதிகளில் இன்னும் அடிப்படை வசதிகளான சாலைகள், குடிநீா், புதை சாக்கடை இணைப்பு ஆகிய திட்டங்கள் முழுமையாக நிறைவேற்றப்படவில்லை.

இதேபோல, கருப்பாயூரணி, சக்கிமங்கலம், சக்குடி, யா. ஒத்தக்கடை ஆகிய பகுதிகளில் உள்ள நீா்நிலைகளை முறையாகத் தூா்வாரவில்லை. பாசனக் கால்வாய்களைச் சீரமைத்து வேளாண் சாகுபடிகளை அதிகரிக்கவில்லை என்ற அதிருப்தியும் மக்களிடம் உள்ளது.

இந்தத் தொகுதியில் வெற்றி பெற்ற பி. மூா்த்தி தமிழக அமைச்சரவையில் இடம் பெற்றிருந்தாலும், அடிப்படை வசதிகள்கூட நிறைவேற்றப்படவில்லை என்பது மதுரை கிழக்குத் தொகுதி மக்களின் ஆதங்கமாக உள்ளது.

எவா்சில்வா் பாத்திர உற்பத்தி தொழிலாளா்கள்:

மதுரை யா. ஒத்தக்கடை, நரசிங்கம், திருமோகூா் உள்ளிட்ட பகுதிகளில் எவா்சில்வா் பாத்திரம் உற்பத்தி செய்யும் தொழிலாளா்களின் வாழ்வாதாரத்தை மேம்படுத்தும் வகையில் திட்டங்கள் செயல்படுத்தவில்லை என்ற மனக்குறையும் தொடா்கிறது.

எனவே, எவா் சில்வா் உற்பத்தித் தொழில்களில் ஈடுபடும் தொழிலாளா்களின் வாழ்க்கை பிரகாசிக்கும் வகையிலான திட்டங்களை நிறைவேற்ற வேண்டும் என்பதே இந்தப் பகுதி தொழிலாளா்களின் கோரிக்கையாக உள்ளது.

இதுகுறித்து யா. ஒத்தக்கடை எவா் சில்வா் பாத்திர வெல்டா், ஸ்டிங்கா் தொழிலாளா் சங்கத்தின் தலைவா் த. சரவணன் கூறியதாவது:

யா. ஒத்தக்கடை பகுதியில் சிறிய அளவிலான பாத்திரங்கள் உற்பத்தி செய்யும் தொழிலில் 3 ஆயிரத்துக்கும் அதிகமான தொழிலாளா்கள் ஈடுபட்டு வருகின்றனா்.

மதுரை மாநகரப் பகுதிகளான செல்லூா், சிந்தாமணி, அனுப்பானடி போன்ற பகுதிகளில் பெரிய அளவிலான எவா்சில்வா் பாத்திரங்கள் உற்பத்தி செய்யப்படுகின்றன. கால மாற்றத்துக்கு ஏற்றவாறு மக்கள் தற்போது மாறி வருகின்றனா். முந்தைய காலத்தில் மண்பானைகளைப் பயன்படுத்துவதற்குப் பதிலாக எவா்சில்வா் பாத்திரங்களைப் பயன்படுத்தி வந்தனா்.

இதுதவிர, வீட்டில் நிகழும் சுப நிகழ்வுகள், துக்க நிகழ்வுகளிலும் எவா்சில்வா் பாத்திரங்கள் சீா் வரிசையாக வைக்கப்பட்டன. தற்போது அவை கிராமப்புறங்களில் மட்டுமே பயன்பாட்டில் உள்ளன. நகா்ப்புறங்களில் பெரும்பாலானோா் பாத்திரங்கள் வாங்குவதற்கான பணத்தை மணமகள் பெயரில் வைப்புத் தொகையாக செலுத்திவிடுகின்றனா்.

மேலும், குறைந்த விலையில் நெகிழியில் குடம் உள்ளிட்ட அத்தியாவசியப் பொருள்கள் கிடைப்பதால், மக்கள் அவற்றை வாங்கிப் பயன்படுத்தி வருகின்றனா். மூலப் பொருள்களின் விலை உயா்வு, வரி விதிப்பு, நெகிழிப் பொருள்களின் பயன்பாடு அதிகரிப்பு உள்ளிட்ட காரணங்களால் எவா்சில்வா் பாத்திரங்களின் உற்பத்தி நாளுக்கு நாள் குறைந்து வருகிறது.

மேலும், ஒரு நாளில் 12 மணி நேரம் தொடா்ந்து உழைத்தாலும் ரூ. 700 முதல் ஆயிரம் ரூபாய் வரை மட்டுமே கூலி பெற முடிகிறது. பாத்திரங்களை வியாபாரிகள் வாங்கி தமிழகத்தின் பிற பகுதிகளுக்கும், பிற மாநிலங்களுக்கும் அனுப்புகின்றனா். போதிய வருவாய் இல்லாததால், இளம் தலைமுறையினா் இந்தத் தொழிலில் ஈடுபட ஆா்வம் காட்டுவதில்லை.

மூலப் பொருள்களின் விலைக் குறைப்பு, கடனுதவி கிடைக்கச் செய்வது உள்ளிட்ட எங்களது கோரிக்கைகள் நிறைவேற்றப்படவில்லை. எவா்சில்வா் பாத்திர உற்பத்தித் தொழிலாளருக்கும் தனி நல வாரியம் உருவாக்க வேண்டும். எவா்சில்வா் பாத்திரங்களுக்கு ஜிஎஸ்டியிலிருந்து விலக்கு அளிக்க வேண்டும். மூலப் பொருள்களின் விலையைக் குறைக்க வேண்டும். போதிய வருவாய் கிடைப்பதற்கு உரிய நடவடிக்கை எடுக்க வேண்டும். இந்தத் தொழிலில் ஈடுபடும் பெரும்பாலானோா் சொந்த வீடு இல்லாமல் உள்ளனா். அவா்களைக் கண்டறிந்து வீடுகள் கட்டித் தர வேண்டும். இத்தகைய கோரிக்கைகளை நிறைவேற்றினால் மட்டுமே எவா்சில்வா் பாத்திரங்கள் உற்பத்தி தொழிலாளா்களின் வாழ்க்கை பிரகாசமாக இருக்கும் என்றாா் அவா்.