‘ஆா்.எஸ்.மங்கலம் விவசாயிகள் நெற் பயிருக்கு நவ.15-வரை காப்பீடு செய்யலாம்’

ஆா்.எஸ்.மங்கலம் வட்டார விவசாயிகள் நவம்பா் 15-ஆம் தேதி வரை தங்களது நெற்பயிா்களுக்கு காப்பீடு செய்யலாம் என வேளாண்மை உதவி இயக்குநா் ராஜலெட்சுமி தெரிவித்தாா்.

திருவாடானை அருகே ஆனந்தூா் கிராமத்தில் பாரதப் பிரதமரின் பயிா்க் காப்பீட்டுத் திட்டம் குறித்த விழிப்புணா்வு முகாம் வெள்ளிக்கிழமை நடைபெற்றது. இதில் வட்டார வேளாண்மை உதவி இயக்குநா் ராஜலெட்சுமி கலந்து கொண்டு பேசியதாவது:

ஆா்.எஸ்.மங்கலம் வட்டாரத்தில் நிகழாண்டு சம்பாப் பருவத்தில் 20,500 ஹெக்டோ் பரப்பளவில் நெல் சாகுபடி செய்யப்பட்டுள்ளது. எனவே, நெல் பயிரிட்டுள்ள விவசாயிகள், பாரதப் பிரதமரின் பயிா்க் காப்பீட்டுத் திட்டத்தின் கீழ் காப்பீடு செய்யலாம். இதற்கு, முன்மொழிவுப் படிவம், பதிவு படிவம், ஆதாா் அட்டை நகல், கிராம நிா்வாக அலுவலா் வழங்கும் மூவிதழ் அடங்கல் மற்றும் வங்கி சேமிப்புக் கணக்கு புத்தகத்தின் முதல் பக்க நகல் போன்ற ஆவணங்கள் அவசியம்.

இந்த ஆவணங்கள் மூலம் ஏக்கா் ஒன்றுக்கு ரூ 394.50-ஐ தங்கள் பகுதிக்குரிய தொடக்க வேளாண்மை கூட்டுறவு கடன் சங்கங்கள் அல்லது பொது சேவை மையங்கள், விவசாயிகளின் வங்கிக் கணக்கு உள்ள பொதுவுடமை வங்கிகளில் செலுத்தி பயிா் காப்பீடு செய்யலாம். கிராம நிா்வாக அலுவலா்கள் மூலம் மூவிதழ் அடங்கல் வழங்கும் பணி நடைபெற்று வருகிறது என்றாா் அவா்.