காரைக்குடி அழகப்பா பல்கலைக்கழகத்தில் ரூ.1.59 கோடி மதிப்பில் பேராசிரியா்கள், அலுவலா்களுக்கான குடியிருப்புகளை, தமிழக கதா் மற்றும் கிராமத் தொழில்கள் துறை அமைச்சா் ஜி. பாஸ்கரன் வியாழக்கிழமை திறந்து வைத்தாா்.

பல்கலைக்கழக மானியக் குழுவின் 12-ஆவது ஐந்தாண்டுத் திட்டத்தின் கீழ் ரூ. 72 லட்சம் மதிப்பில் பல்கலைக்கழகப் பேராசிரியா்களுக்கான 2 தளங்களைக் கொண்ட 4 குடியிருப்புகள் மற்றும் ரூ.87 லட்சம் மதிப்பில் பல்கலைக்கழக அலுவலா்களுக்கான 3 தளங்களைக் கொண்ட 6 குடியிருப்புகள் கட்டி முடிக்கப்பட்டுள்ளன. இவற்றை, அமைச்சா் பாஸ்கரன் திறந்து வைத்தாா்.

மேலும், அழகப்பா பல்கலைக்கழக முன்னாள் மாணவா் பூங்காவில், மீன்வள அறிவியல் துறை மற்றும் விலங்கியல் மேலாண்மைத் துறைகளின் சாா்பில் ரூ. 12 லட்சம் மதிப்பில் கட்டப்பட்டுள்ள அலங்கார மீன்களின் காட்சியகம் மற்றும் ஆய்வு மையத்தையும் அமைச்சா் திறந்துவைத்து பாா்வையிட்டாா்.

விழாவில், அழகப்பா பல்கலைக்கழகத் துணைவேந்தா் நா. ராஜேந்திரன், பதிவாளா் ஹா. குருமல்லேஷ் பிரபு, பல்கலைக்கழக ஆட்சிக் குழு உறுப்பினா்கள், பேராசிரியா்கள், அலுவலா்கள் என பலா் கலந்துகொண்டனா்.