வாழ்வில் சாதிப்பதையே லட்சியமாக கொள்ள வேண்டும்

இன்றைய இளைஞா்கள் வாழ்வில் சாதிப்பதையே லட்சியமாக கொள்ள வேண்டும் என இலுப்பகுடி இந்தோ திபெத் எல்லைப் பாதுகாப்பு படை பயிற்சி மையத்தின் டிஐஜி எஸ்பி. அஜல் சா்மா தெரிவித்துள்ளாா்.

சிவகங்கை அருகே அரசனூரில் உள்ள பாண்டியன் சரசுவதி யாதவ் பொறியியல் கல்லூரியில் 19 ஆம் ஆண்டு விளையாட்டு நாள் விழா வியாழக்கிழமை நடைபெற்றது. விழாவுக்கு அக்கல்விக் குழுமத்தின் நிறுவனரும், முன்னாள் சட்டப்பேரவை உறுப்பினருமான மலேசியா எஸ். பாண்டியன் தலைமை வகித்தாா். நிா்வாக இயக்குநா் எஸ்.பி. வரதராஜன் முன்னிலை வகித்தாா்.

இதில், இலுப்பகுடி இந்தோ திபெத் எல்லைப் பாதுகாப்புப் படை பயிற்சி மையத்தின் டிஐஜி எஸ்பி. அஜல் சா்மா சிறப்பு விருந்தினராக கலந்து கொண்டு வெற்றி பெற்ற மாணவ, மாணவிகளுக்கு பரிசுகளை வழங்கிப் பேசியது: மாணவா்கள் பாடத் திட்டங்கள் மட்டுமின்றி பிற துறை சாா்ந்த புத்தகங்களையும் தேடி பயில முன் வர வேண்டும். விளையாட்டு உள்ளிட்ட பிற துறைகளிலும் கவனம் செலுத்த வேண்டும். உலக அளவில் நம்நாடு அனைத்துத் துறைகளிலும் சாதனை படைப்பதற்கு இளைஞா்களின் பங்களிப்பு அவசியம். இளைஞா்கள் தங்கள் வாழ்வில் ஏற்படும் இன்னல்களை தாங்கி சாதிப்பதையே லட்சியமாக கொள்ள வேண்டும் என்றாா்.

இந்நிகழ்ச்சியில், உடற்கல்வி இயக்குநா்கள் எஸ். விக்னேஷ்வரன், ஆா். பழனிச்சாமி, முருகன் உள்ளிட்ட அனைத்துத் துறை பேராசிரியா்கள், மாணவ, மாணவிகள் கலந்து கொண்டனா். முன்னதாக, கல்லூரியின் முதல்வா் ஆா். ராஜா வரவேற்றாா். உடற்கல்வி இயக்குநா் எஸ். சுகன்யா நன்றி கூறினாா்.