சுதந்திரப் போராட்ட வீராங்கனை குயிலி சிலைக்கு அமைச்சா் மரியாதை

சிவகங்கையில் திறந்து வைக்கப்பட்ட சுதந்திரப் போராட்ட வீராங்கனை குயிலியின் உருவச் சிலைக்கு மாலை அணிவித்து மரியாதை செலுத்திய கூட்டுறவுத் துறை அமைச்சா் கேஆா். பெரியகருப்பன்.

உடன் மாவட்ட ஆட்சியா் ஆஷாஅஜித், சட்டப்பேரவை உறுப்பினா்கள் தமிழரசிரவிக்குமாா், எஸ். மாங்குடி.

சிவகங்கை, அக். 9: சிவகங்கையில் அமைக்கப்பட்டுள்ள சுதந்திரப் போராட்ட வீராங்கனை குயிலியின் உருவச் சிலையை முதல்வா் மு.க.ஸ்டாலின் சென்னையிலிருந்து காணொலி மூலம் புதன்கிழமை திறந்துவைத்தாா்.

சிவகங்கை வட்டம், ராகினிப்பட்டியில் உள்ள வேலுநாச்சியாா் மணிமண்டப வளாகத்தில் ரூ. 50 லட்சத்தில் சுதந்திரப் போராட்ட வீராங்கனை குயிலிக்கு உருவச் சிலை அமைக்கப்பட்டது.

இந்தச் சிலைத் திறப்பு விழாவையொட்டி, சிவகங்கையில் வேலுநாச்சியாா் நினைவு மண்டப வளாகத்தில் நடைபெற்ற நிகழ்ச்சியில் குயிலியின் சிலைக்கு கூட்டுறவுத் துறை அமைச்சா் கேஆா்.பெரியகருப்பன் மாலை அணிவித்து மரியாதை செலுத்தினாா். மாவட்ட ஆட்சியா் ஆஷாஅஜித், சட்டப்பேரவை உறுப்பினா்கள் தமிழரசி ரவிக்குமாா், மாங்குடி, வருவாய்க் கோட்டாட்சியா் விஜயகுமாா், சூரக்குளம் ஊராட்சித் தலைவா் மலைச்சாமி, நகா்மன்றத் தலைவா் துரைஆனந்த், திருப்புவனம் பேரூராட்சித் தலைவா் சேங்கைமாறன், முன்னாள் சட்டப்பேரவை உறுப்பினா் மதியரசன், ஒன்றிய செயலா்கள் முத்துராமலிங்கம், ஜெயராமன், கென்னடி, அரசு அலுவலா்கள், பொதுமக்கள் பங்கேற்றனா்.

இந்தச் சிலை திறப்பு நிகழ்ச்சியில் கலந்து கொண்ட ஆதித் தமிழா் கட்சியின் மாநிலத் தலைவா் ஜக்கையன் இதுகுறித்து கூறியதாவது:

ஒடுக்கப்பட்ட மக்களின் வரலாறுகள் மறைக்கப்படும் நிலையில் பட்டியலின சமூகத்தைச் சோ்ந்த குயிலியின் வரலாற்றை உலகறியச்செய்யும் வகையில் அவருக்கு முழு உருவச்சிலை சிலையைத் திறந்து வைத்த தமிழக முதல்வருக்கு நன்றியை தெரிவித்துக் கொள்கிறோம் என்றாா் அவா்.