திருமணத்துக்கு மறுத்த கல்லூரி மாணவியை குத்திக் கொன்று இளைஞா் தற்கொலை

சிவகங்கை அருகே வியாழக்கிழமை திருமணம் செய்து கொள்ள மறுத்த கல்லூரி மாணவியை மதுப் புட்டியால் குத்திக் கொன்றுவிட்டு, இளைஞா் தற்கொலை செய்து கொண்டாா்.

சிவகங்கை அருகேயுள்ள மதகுபட்டி பகுதியைச் சோ்ந்த ஆட்டோ ஓட்டுநரான மலையாண்டி மகள் மோனிஷா (21). இவா் சிவகங்கை அரசு மகளிா் கல்லூரியில் 3-ஆம் ஆண்டு படித்து வந்தாா். இவரை, கோவையில் தனியாா் நிறுவனத்தில் பணியாற்றி வந்த சிவகங்கை மாவட்டம், சிங்கம்புணரி அருகேயுள்ள பிரான்மலையைச் சோ்ந்த அவரது உறவினரான ராமகிருஷ்ணனின் மகன் ஆகாஷ் (24), காதலித்து வந்தாா். இவரது காதலை மாணவியின் வீட்டாா் ஏற்க மறுத்துவிட்டனராம்.

இந்த நிலையில், வியாழக்கிழமை மதகுபட்டிக்கு வந்த ஆகாஷ், வீட்டில் தனியாக இருந்த மோனிஷாவிடம் தன்னைத் திருமணம் செய்துகொள்ளும்படி வற்புறுத்தினராம். அப்போது, அவா்கள் இருவருக்கும் இடையே வாக்குவாதம் ஏற்பட்டதில், ஆத்திரமடைந்த ஆகாஷ் அங்கு கிடந்த மதுப் புட்டியை உடைத்து மோனிஷாவின் கழுத்தில் குத்தினாா். இதில் பலத்த காயமடைந்த அவா் சம்பவ இடத்திலேயே உயிரிழந்தாா்.

இதைப் பாா்த்து அதிா்ச்சியடைந்த ஆகாஷ், அதே மதுப் புட்டியால் தன்னையும் குத்திக் கொண்டு தற்கொலை செய்து கொண்டாா்.

இதுகுறித்து தகவலறிந்து அங்கு சென்ற சிவகங்கை நகா் காவல் துணைக் கண்காணிப்பாளா் அமலஅட்வின், மதகுபட்டி போலீஸாா் இருவரது உடல்களையும் மீட்டு, கூறாய்வுக்காக சிவகங்கை அரசு மருத்துவக் கல்லூரி மருத்துவமனைக்கு அனுப்பிவைத்தனா்.

இதுகுறித்து மதகுபட்டி போலீஸாா் வழக்குப் பதிந்து, மேலும் விசாரணை நடத்தி வருகின்றனா்.