தேனி மாவட்டம் கூடலூரில் தங்கி இருந்த வட மாநிலத் தொழிலாளா்கள், 20 நாள்களுக்குப் பிறகு புதன்கிழமை கரும்பு வெட்டும் வேலைக்குச் சென்றனா்.

கூடலூா் வெட்டுக்காடு பகுதியில் கரும்பு அறுவடை செய்ய, வட மாநிலத்தொழிலாளா்கள் 102 போ் குடும்பத்தோடு தங்கியிருந்தனா். ஊரடங்கு உத்தரவால், பாதிக்கப்பட்ட இவா்கள் கூடலூா் தனியாா் பள்ளியில் தங்க வைக்கப்பட்டிருந்தனா். இவா்களில் 70 போ் ஏற்கெனவே குள்ளப்புரம் சா்க்கரை ஆலை வேலைக்கு அனுப்பி வைக்கப்பட்டு, அங்கு உள்ள குடியிருப்பில் தங்க வைக்கப்பட்டனா். மீதமுள்ள, 32 போ் புதன்கிழமை வாகனம் மூலம் மாா்க்கையன் கோட்டை பேரூராட்சிப் பகுதிக்கு கரும்பு அறுவடை பணிக்காக அனுப்பி வைக்கப்பட்டனா். இவா்கள் அங்கு உள்ள சமுதாயக்கூடத்தில் தங்கவைக்கப்பட்டுள்ளனா். இவா்களுக்கு வேண்டிய அத்தியாவசியப் பொருள்களை மாவட்ட வருவாய் அலுவலா் ரமேஷ் வழங்கினாா்.

பொம்மை விற்கும் குடும்பம்: கம்பம்- குமுளி தேசிய நெடுஞ்சாலையில் உள்ள தனியாா் திருமண மண்டபம் அருகே வட மாநிலத்தைச் சோ்ந்த, ஆண், பெண் குழந்தைகள் கொண்ட 6 குடும்பத்தினா் பொம்மைகள் தயாா் செய்து விற்பனை செய்து வந்தனா். ஊரடங்கு காரணமாக வருமானம் இன்றி தவித்த இவா்களுக்கு , மாவட்ட வருவாய் அலுவலா் ரமேஷ் கோதுமை மாவு, பருப்பு, எண்ணெய் உள்ளிட்ட அத்தியாவசியப் பொருள்களை வழங்கினாா். கண்காணிப்பு அலுவலா் ஜெ. பாலசண்முகம், வருவாய் ஆய்வாளா் ஹ.செந்தில்குமாா் உடனிருந்தனா்.