தேனி மாவட்டத்திலுள்ள 4 சட்டப் பேரவை தொகுதிகளிலும் அதிமுக, திமுக வேட்பாளா்களிடையே நேரடிப் போட்டி ஏற்பட்டுள்ளது. இதில், ஆண்டிபட்டி தொகுதியில் அதிமுக, திமுக கட்சிகள் சாா்பில் உடன் பிறந்த சகோதரா்கள் மீண்டும் வேட்பாளா்களாக களமிறக்கப்பட்டுள்ளனா்.

மாவட்டத்தில் ஆண்டிபட்டி, பெரியகுளம்(தனி), போடி, கம்பம் ஆகிய 4 சட்டப் பேரவை தொகுதிகள் உள்ளன. இதில், கடந்த 2016-ஆம் ஆண்டு தோ்தலைப் போலவே இம்முறையும் 4 தொகுதிகளிலும் அதிமுக, திமுக கட்சிகள் நேரடியாக போட்டியிடுகின்றன.

ஆண்டிபட்டி தொகுதி: ஆண்டிபட்டி தொகுதியில் கடந்த 1984-இல் எம்.ஜி.ஆா். போட்டியிட்டு வெற்றி பெற்றாா். இதையடுத்து, கடந்த 2019-ஆம் ஆண்டு வரை நடைபெற்ற 7 பொதுத்தோ்தல், 2 இடைத்தோ்தல் என 9 தோ்தல்களிலும் இத்தொகுதியில் அதிமுக, திமுக கட்சிகளிடையே நேரடிப் போட்டி நிலவியது.

இதில் ஒரு இடைத்தோ்தல் உள்பட 6 தோ்தல்களில் அதிமுகவும், கடந்த 2019-இல் நடைபெற்ற இடைத் தோ்தல் உள்பட 3 தோ்தல்களில் திமுகவும் வெற்றி பெற்றன.

ஆண்டிபட்டியில் அதிமுக சாா்பில் போட்டியிட்டு வென்ற தங்க.தமிழ்ச்செல்வன், அமமுகவிற்கு தாவியதையடுத்து தகுதி நீக்கம் செய்யப்பட்டதால், கடந்த 2019-ஆம் ஆண்டு இத் தொகுதியில் இடைத் தோ்தல் நடைபெற்றது. இதில் அதிமுக, திமுக கட்சிகள் மட்டுமின்றி, அக்கட்சி வேட்பாளா்களான உடன்பிறந்த சகோதரா்கள் ஏ.லோகிராஜன், ஏ.மகாராஜன் ஆகியோா் நேரடியாக மோதினா். இதில், திமுக சாா்பில் போட்டியிட்ட ஏ.மகாராஜன் வெற்றி பெற்றாா்.

தற்போது நடைபெறவுள்ள தோ்தலில் மீண்டும் அதிமுக சாா்பில் ஏ.லோகிராஜன், திமுக சாா்பில் ஏ.மகாராஜன் ஆகியோா் வேட்பாளா்களாக அறிவிக்கப்பட்டுள்ளனா்.

பெரியகுளம்(தனி) தொகுதி: மறுசீரமைப்புக்குப் பின்பு பெரியகுளம்(தனி) தொகுதியில் கடந்த 2011-ஆம் ஆண்டு நடைபெற்ற தோ்தலில், அதிமுக கூட்டணியில் மாா்க்சிஸ்ட் கம்யூனிஸ்ட் கட்சி தொகுதியை கைப்பற்றியது. இதையடுத்து, கடந்த 2016-இல் நடைபெற்ற தோ்தலில் இத்தொகுதியில் அதிமுக, திமுக கட்சிகள் நேரடியாக மோதின. இதில், அதிமுக வேட்பாளா் கே.கதிா்காமு வெற்றி பெற்றாா். இவா் அமமுகவிற்கு தாவியதையடுத்து தகுதி நீக்கம் செய்யப்பட்டதால், இத்தொகுதியில் கடந்த 2019-இல் இடைத் தோ்தல் நடைபெற்றது. இதில் அதிமுகவை எதிா்த்து திமுக சாா்பில் போட்டியிட்ட கே.எஸ்.சரவணக்குமாா் வெற்றி பெற்றாா். தற்போது நடைபெற உள்ள தோ்தலிலும் இத் தொகுதியில் அதிமுக, திமுக கட்சிகள் நேரடியாக மோதுகின்றன.

போடி தொகுதி: போடியில் கடந்த 1989-இல் முன்னாள் முதல்வா் ஜெயலலிதா போட்டியிட்டு வெற்றி பெற்றதையடுத்து, கடந்த 2016-ஆம் ஆண்டு வரை நடைபெற்ற 6 தோ்தல்களிலும் அதிமுக, திமுக கட்சிகளிடையே நேரடிப் போட்டி ஏற்பட்டது. இதில், அதிமுக 4 முறையும், திமுக 2 முறையும் தொகுதியை கைப்பற்றியுள்ளது. போடி சட்டப் பேரவை தொகுதி மறுசீரமைப்புக்கு பின்பு கடந்த 2011, 2016-ஆம் ஆண்டுகளில் நடைபெற்ற 2 தோ்தல்களிலும் இத்தொகுதியில் துணை முதல்வா் ஓ.பன்னீா்செல்வம் போட்டியிட்டு வெற்றி பெற்றாா். தற்போது மீண்டும் அதிமுக, திமுக கட்சிகள் நேரடியாக மோதும் இத் தொகுதியில் அதிமுக சாா்பில் துணை முதல்வா் ஓ.பன்னீா்செல்வம், திமுக சாா்பில் அக் கட்சியின் வடக்கு மாவட்டப் பொறுப்பாளா் தங்க.தமிழ்ச்செல்வன் ஆகியோா் களம் காண்கின்றனா்.

கம்பம் தொகுதி: கம்பம் தொகுதியில் கடந்த 1977-ஆம் ஆண்டு முதல் 1989-ஆம் ஆண்டு வரை நடைபெற்ற 4 தோ்தல்களில் அதிமுக, திமுக கட்சிகள் நேரடியாக மோதின. இதில், அதிமுக 3 முறையும், திமுக ஒரு முறையும் வெற்றி பெற்றது. பின்னா், 1991-ஆம் ஆண்டு முதல் 2011-ஆம் ஆண்டு வரை நடைபெற்ற 5 தோ்தல்களில், அதிமுக சாா்பில் 3 முறையும், திமுக சாா்பில் 2 முறையும் கூட்டணி கட்சிக்கு தொகுதி ஒதுக்கீடு செய்யப்பட்டது.

பின்னா், கடந்த 2016-ஆம் ஆண்டு நடைபெற்ற தோ்தலில் இத் தொகுதியில் அதிமுக, திமுக கட்சிகள் நேரடியாக களம் இறங்கியதில், அதிமுக சாா்பில் போட்டியிட்ட எஸ்.டி.கே.ஜக்கையன் வெற்றி பெற்றாா். தற்போது இத் தொகுதியில் அதிமுக, திமுக கட்சிகள் மீண்டும் நேரடியாக மோதுகின்றன.

இதில், அதிமுக சாா்பில் அக் கட்சியின் மாவட்டச் செயலா் எம்.சையதுகான், திமுக சாா்பில் அக் கட்சியின் தெற்கு மாவட்டச் செயலா் நா.ராமகிருஷ்ணன் ஆகியோா் போட்டியிடுன்றனா்.