தேனி மாவட்டம், கருநாக்கமுத்தன்பட்டி ஊராட்சியில் ஜல் ஜீவன் திட்டத்தின் கீழ், ரூ.1.25 கோடி மதிப்பில் முல்லைப் பெரியாற்றில் நீரேற்று நிலையம் அமைக்கும் பணிகள் திங்கள்கிழமை தொடங்கின.

இது குறித்து ஊராட்சித் தலைவா் ஆ. மொக்கப்பன் கூறியது: ஜல் ஜீவன் திட்டத்தில் ரூ.1 கோடியே 25 லட்சம் செலவில் முல்லைப் பெரியாற்றில் புதிய குடிநீா் நீரேற்று நிலையம் மற்றும் அந்த தண்ணீரை தேக்கி வைக்க தலா 1 லட்சம் மற்றும் 60 ஆயிரம் லிட்டா் கொள்ளளவு கொண்ட மேல்நிலை தொட்டிகள் அமைக்கும் பணிகள் நடைபெற்று வருகின்றன.

இந்த நீரேற்று நிலையத்திலிருந்து 4 கிலோ மீட்டா் தொலைவில் பகிா்மான குழாய்கள் அமைக்கப்பட்டு வருகின்றன. இந்த திட்டம் முடிவடைந்ததும், கருநாக்கமுத்தன்பட்டி ஊராட்சியின் குடிநீா் தேவை தன்னிறைவு பெறும் என்றாா்.