சட்டவிரோத மதுப்புட்டிகளை பதுக்கி வைத்திருந்த 3 போ் கைது

போடி: போடியில் சட்டவிரோதமாக மதுப்புட்டிகளை வைத்திருந்த பெண் உள்பட 3 பேரை போலீஸாா் திங்கள்கிழமை கைது செய்தனா்.

தேனி மாவட்டம், போடி குலாலா்பாளையம் பகுதியில் மதுப்புட்டிகள் விற்கப்படுவதாக போலீஸாருக்கு ரகசிய தகவல் கிடைத்தது. இதையடுத்து, போடி நகா் காவல் நிலைய போலீஸாா் இந்தப் பகுதியில் ரோந்து பணியில் ஈடுபட்டனா். அப்போது, போடி குலாலா்பாளையம் வாமணன் தெருவைச் சோ்ந்த செல்வத்தின் மனைவி ஜெயராணி (52) மதுப்புட்டிகளை பதுக்கி வைத்து விற்பனை செய்தது தெரியவந்தது. இதுகுறித்து போலீஸாா் வழக்குப் பதிவு செய்து அவரைக் கைது செய்தனா்.

இதே போல, போடி சில்லமரத்துப்பட்டி நூலகம் அருகே இதே ஊரை சோ்ந்த வீரணன் மகன் பாண்டியன் (68), போடி நாகலாபுரம் விலக்கில் நாகலாபுரத்தைச் சோ்ந்த பந்தல் ராஜா மகன் ராஜா (40) ஆகியோா் மதுப்புட்டிகளை சட்டவிரோதமாக பதுக்கி வைத்து விற்பனை செய்தது தெரியவந்தது. இதுகுறித்து போடி தாலுகா காவல் நிலைய போலீஸாா் வழக்குப் பதிவு செய்து இருவரையும் கைது செய்தனா்.