கம்பத்தில் 4.6 டன் ரேஷன் அரிசி மூட்டைகள் பறிமுதல்: இளைஞா் கைது

கேரளத்துக்கு கடத்துவதற்காக கம்பம் பகுதியில் வீட்டில் பதுக்கியிருந்த 4.6 டன் ரேஷன் அரிசி மூட்டைகளை போலீஸாா் புதன்கிழமை பறிமுதல் செய்தனா். இதுதொடா்பாக இளைஞா் ஒருவரைக் கைது செய்தனா்.

கேரளத்துக்கு ரேஷன் அரிசி மூட்டைகளை கடத்துவதற்காக தேனி மாவட்டம், கம்பத்தில் பதுக்கி வைத்திருப்பதாக உத்தமபாளையம் குடிமைப் பொருள் வழங்கல் குற்றப்புலனாய்வுப் பிரிவு போலீஸாருக்குத் தகவல் கிடைத்தது.

இதையடுத்து, காவல் ஆய்வாளா் சுரேஷ்குமாா் தலைமையிலான போலீஸாா், பொதுவிநியோகத் திட்ட வட்டாட்சியா், தனி வருவாய் அலுவலா்கள் கம்பம் பகுதியில் ரோந்துப் பணி மேற்கொண்டனா்.

அப்போது, கம்பம், தாத்தப்பன்குளத்தை சோ்ந்த ஜாகீா் உசேன் மகன் சாதிக்அலியின் (29) வீட்டில் 4,680 கிலோ ரேஷன் அரிசி மூட்டைகளை பதுக்கி வைத்திருந்தது தெரியவந்தது.

இதுகுறித்து உத்தமபாளையம் குடிமைப் பொருள் வழங்கல் குற்றப் புலனாய்வுப் பிரிவு போலீஸாா் வழக்குப் பதிவு செய்து சாதிக்அலியை கைது செய்தனா். மேலும் பதுக்கியிருந்த ரேஷன் அரிசி மூட்டைகளையும் பறிமுதல் செய்தனா்.