விருதுநகர் மாவட்டம், அருப்புக்கோட்டை நகர் 28 ஆவது வார்டில் அடிப்படை வசதிகள் செய்து தரக் கோரிக்கை எழுந்துள்ளது.
அருப்புக்கோட்டை நகராட்சிக்குள்பட்ட 28 ஆவது வார்டில் எஸ்.ஆர். தெரு உள்ளது. நகர் விரிவாக்கப் பகுதியான இங்கு, 4 தெருக்களில் 50-க்கும் மேற்பட்ட வீடுகள் உள்ளன. இந்த தெருக்களில் போதிய மின்விளக்குகள் அமைக்கப்படவில்லை. இதனால், இரவு நேரங்களில் பெண்கள் நடமாட அச்சப்படுகின்றனர். இங்குள்ள பிரதானச் சாலை சேதமடைந்து பராமரிப்பின்றி உள்ளது. வாருகால் வசதியில்லாததால் மழைக் காலத்தில் தெருவோரங்களில் கழிவுநீர் தேங்கி நோய் பரவும் அபாயம் உள்ளது. 
இப்பகுதியில் அனைத்து தெருக்களிலும் உரிய அடிப்படை வசதிகளையும் செய்து தரவேண்டும் என பொதுமக்கள் நகராட்சி நிர்வாகத்திடம் பலமுறை கோரிக்கை விடுத்தும் பலனில்லை. 
எனவே, இப்பகுதியில் உடனடியாக அடிப்படை வசதிகளை நிறைவேற்ற நகராட்சி நிர்வாகம் நடவடிக்கை எடுக்கவேண்டும் என வலியுறுத்தியுள்ளனர்.