விருதுநகா் சந்தைக்கு வரத்து அதிகரிப்பு காரணமாக பாமாயில், பட்டாணி பருப்பு, மல்லி விலை குறைந்துள்ளது.

விருதுநகா் சந்தையில் ஒவ்வொரு வாரமும் அத்தியாவசிய உணவுப் பொருள்களின் விலைப் பட்டியல் வெளியிடப்படும். அதன்படி, கடந்த வாரம் 15 கிலோ பாமாயில் ரூ.1,800-க்கு விற்கப்பட்ட நிலையில், இந்தோனேசியாவிலிருந்து வரத்து அதிகம் காரணமாக தற்போது, ரூ.40 குறைந்து, ரூ.1,760-க்கு விற்கப்படுகிறது. மல்லி ( 40 கிலோ) லயன் வகையானது கடந்த வாரம் ரூ.5,300 முதல் 5,500 வரை விற்கப்பட்டு வந்த நிலையில், இந்த வாரம் ரூ.100 குறைந்து ரூ.5,200 முதல் 5,400 வரை விற்பனையாகிறது. அதேபோல், பட்டாணி பருப்பு 100 கிலோ ( இந்தியா) கடந்த வாரம் ரூ.6,400-க்கு விற்பனை செய்யப்பட்டது. இந்த வாரம் குவிண்டாலுக்கு ரூ.100 குறைந்து ரூ.6,300-க்கு விற்பனை செய்யப்படுகிறது.

மேலும், கடலை புண்ணாக்கு 100 கிலோ ரூ.4,700-க்கு விற்கப்பட்டு வந்த நிலையில் ரூ.200 குறைந்து தற்போது ரூ.4,500-க்கு விற்பனையாகிறது. பிற உணவுப் பொருள்களின் விலையில் எவ்வித மாற்றமும் இல்லை.