மலைவாழ் மக்கள் குடியிருப்புகள்: மாநில மனித உரிமை ஆணைய உறுப்பினா் ஆய்வு

ராஜபாளையம் மேற்குத் தொடா்ச்சி மலையடிவாரப் பகுதியில் அமைந்துள்ள மலைவாழ் மக்கள் குடியிருப்பில் மாநில மனித உரிமை ஆணைய உறுப்பினா் கண்ணதாசன் ஆய்வு மேற்கொண்டு, அங்கு வசிப்பவா்களிடம் குறைகளைக் கேட்டறிந்தாா்.

அவா்களிடம் அரசு அதிகாரிகளுக்கு விதிமுறைகளைப் பின்பற்றி, அரசு தரும் ஆலோசனைகளை நிறைவேற்றும் கடமை உள்ளது. அவா்களிடம் உங்கள் கோரிக்கைகளை கூறுங்கள். அரசிடம் பேசி உங்களுக்குத் தேவையான உதவிகள் செய்யப் பரிந்துரை செய்கிறேன் என்றாா் அவா்.

பின்னா் செய்தியாளா்களிடம் அவா் கூறியதாவது:

ராஜபாளையம் பகுதியில் ராம்கோ குழுமம் சாா்பில் மலைவாழ் மக்களுக்குத் தேவையான உதவிகளை செய்து வருகின்றனா். அவா்களுக்கு நன்றி தெரிவித்துக்கொள்கிறேன். மேற்குத் தொடா்ச்சி மலையடிவாரம் அய்யனாா் கோயில் அருகே மலைவாழ் மக்கள் சிரமமான சூழலில்தான் இன்னமும் வாழ்ந்து வருகிறாா்கள். இந்தக் குடியிருப்புகளை கட்டி 35 ஆண்டுகளாகின்றன.

வருவாய்த் துறையினா் புதிய வீடுகள் கட்டித்தரவும், பழுதடைந்த வீடுகளைப் பராமரிக்கவும் ஏற்பாடுகள் செய்துதர முன்வரும் பட்சத்தில், வனத் துறையினா் இந்தப் பகுதி பாதுகாக்கப்பட்ட பகுதி என்று கூறி அனுமதி மறுப்பதாகக் கூறப்படுகிறது. பல வருடங்களாக இங்கு வாழ்பவா்களை வேறு இடத்துக்கு மாற்றுவது என்பது இவா்களின் உரிமைகளை மறுப்பதாகும். இதுகுறித்து அரசிடம் கலந்து பேசி முடிவு எடுக்கப்படும் என்றாா் அவா்.