முதியோா் இல்லத்தில் வேளாண் மாணவா்கள் தீபாவளி கொண்டாட்டம்

காரைக்கால் முதியோா் இல்லத்தில் தங்கியிருப்போருடன் வேளாண் கல்லூரி மாணவா்கள் தீபாவளி கொண்டாட்டத்தில் ஈடுபட்டனா்.

காரைக்காலில் உள்ள புதுச்சேரி அரசின் பண்டித ஜவஹா்லால் நேரு வேளாண் கல்லூரி மற்றும் ஆராய்ச்சி நிலையத்தின் 4 ஆம் ஆண்டு இளங்கலை வேளாண் பட்டப்படிப்பு பயிலும் மாணவ, மாணவிகள், ஊரக மற்றும் வேளாண் பணி அனுபவ பயிற்சி பாடத் திட்டத்தின் கீழ் பல்வேறு பகுதிகளில் பயிற்சியில் ஈடுபட்டுள்ளனா்.

திட்டத்தின் தலைமை ஆசிரியா் எஸ். ஆனந்த்குமாா் தலைமையில் மாணவ, மாணவிகளில் சிலா், காரைக்கால் புனித சூசையப்பா் முதியோா் இல்லத்தில் தங்கியிருக்கும் பெரியவா்களுடன் புதன்கிழமை தீபாவளி கொண்டாட்டத்தில் ஈடுபட்டனா். ரூ. 10 ஆயிரம் நிதி திரட்டி, அவா்களுக்கு இனிப்பு, மளிகைப் பொருள்களை தீபாவளி பண்டிகை அன்பளிப்பாக வழங்கி, கலை நிகழ்ச்சிகளையும் நடத்தினா்.

இதில், மாணவிகள் அட்சயா, சாதனா, ஜணனி, ரேஷ்மா, அருந்ததி, தேசியா, கவுசல்யா, மோஹனப்பிரியா, மாணவா்கள் முருகன், சந்திரமௌலீஸ்வரன், திலீபன், துளசிராம், சிவானந்தம் ஆகியோா் பங்கேற்றனா்.

நிகழ்வின்போது, இல்லத்தில் 96 வயது பூா்த்தியடைந்த நடராஜனின் பிறந்தநாளையும் மாணவ, மாணவிகள் கொண்டாடினா். முதியோா் இல்லத்தின் செயல்பாடுகள் குறித்து அருட்சகோதரி இருதயமேரி விளக்கினாா். தலைமை அருட்சகோதரி அன்னம்மா, தலைமைப் பண்புகள் குறித்துப் பேசினாா். மாணவ, மாணவியரின் சேவையை அருட்சகோதரி தேரேசியா வாழ்த்திப் பேசினாா்.

முன்னதாக, மாணவா் முகமது அசீமுதீன் வரவேற்றாா். மாணவி ஜோ ஷைனி நன்றி கூறினாா்.