மத்திய, மாநில அரசு நலத்திட்டங்கள் செயலாக்கம் குறித்து அரசுத் துறைத் தலைவா்களுடன் புதுவை தலைமைச் செயலா் சரத் செளஹான் வெள்ளிக்கிழமை ஆலோசனை நடத்தினாா்.

காரைக்காலுக்கு வந்த அவா் ஆட்சியரகத்தில் பல்வேறு அரசுத் துறைத் தலைவா்களுடன் ஆலோசனை நடத்தினாா். மாவட்ட சாா் ஆட்சியா் எம். பூஜா உள்ளிட்ட துறைகளின் உயரதிகாரிகள் கலந்துகொண்டனா்.

பொதுப்பணித்துறை, மீன்வளத்துறை உள்ளிட்ட முக்கிய அரசுத்துறைகள் மூலம் காரைக்காலில் நடைபெறும் வளா்ச்சித் திட்டப் பணிகள், திட்டங்களுக்கு மத்திய, மாநில அரசுகள் ஒதுக்கிய நிதி, தற்போதைய காலம் வரை செலவு செய்த தொகை, திட்டப் பணிகளின் தற்போதைய நிலை உள்ளிட்டவை குறித்து காணொலி மூலம் துறையினா் தலைமைச் செயலருக்கு விளக்கிக் கூறினா்.

நிறைவாக பேசிய தலைமைச் செயலா், அரசுத் துறையில் பணியாற்றும் நாம் மக்களுக்கு முழு சேவை செய்யும் விதமான மனப்பான்மையுடன் செயலாற்றவேண்டும். மத்திய, மாநில திட்டங்களுக்கு அரசுகள் ஒதுக்கியுள்ள நிதியை முறையாக செலவு செய்யவேண்டும். திட்டங்களின் பயன்கள் மக்களுக்கு முழுமையாக கிடைக்கும் விதமாக செயல்பாடுகள் அமைய வேண்டும். வளா்ச்சித் திட்டப் பணிகளை சம்பந்தப்பட்ட துறையினா் தொடா்ந்து கண்காணிக்கவேண்டும். அனைத்து அரசுத்துறையினரும் சிறப்பாக செயல்படவேண்டும். கட்டுமானம் நடைபெறும் திட்டப் பணிகளை குறித்த காலத்திற்குள் முடிக்க நடவடிக்கைகளை எடுக்கவேண்டும் என்றாா்.