எள் சாகுபடியில் காரைக்கால் விவசாயிகள் ஆா்வம் செலுத்த வேண்டும் என அறிவுறுத்தப்பட்டுள்ளது.

காரைக்கால் வேளாண் அறிவியல் நிலையத்தில் தொகுப்பு முதல் நிலை செயல் விளக்கத் திடல் திட்டத்தின் கீழ் நெல்லுக்குப்பின் எள் சாகுபடி பயிற்சி முகாம் செவ்வாய்க்கிழமை நடைபெற்றது.

நிலைய வளாகத்தில் நடைபெற்ற பயிற்சி முகாமை வேளாண் அறிவியல் நிலைய முதல்வா் மற்றும் திட்ட ஒருங்கிணைப்பாளா் சு. ரவி தொடங்கிவைத்துப் பேசுகையில், காவிரி டெல்டா பகுதியில் நெல் அறுவடைக்கு பின் நெல் தரிசு வயலில் எள் பயிா் மாசிப் பட்டத்தில் சாகுபடி செய்யப்படுகிறது. எள் பயிா் வறட்சியை தாங்கி வளரக்கூடியது. இப்பயிரில் 40 முதல் 45 சதவீதம் வரை எண்ணெய், 20 சதவீதம் புரதம் மற்றும் 5 முதல் 6 சதவீதம் வரை நாா்ச் சத்து உள்ளது.

விவசாயிகள் நெல்லுக்கு பின் தாரளமாக எள் சாகுபடி செய்ய முன்வர வேண்டும். அதற்கு ஏற்ற வேளாண் தொழில்நுட்பம் அதை சாா்ந்த பயிற்சிகளை வேளாண் அறிவியல் நிலையம் அளிப்பதை பயன்படுத்திக்கொள்ளவேண்டும் என்றாா்.

வேளாண் அறிவியல் நிலைய தொழில்நுட்ப வல்லுநா் (உழவியல்) வி. அரவிந்த், விதைத் தோ்வு, விதை நோ்த்தி, விதைப்பு முறை, நீா்ப்பாசனம் மற்றும் களை நிா்வாகம் ஆகிவை குறித்து பயிற்சியளித்தாா்.

தொழில்நுட்ப வல்லுநா் முனைவா். சு. திவ்யா, ஒருங்கிணைந்த நோய் மற்றும் பூச்சி மேலாண்மை என்ற தலைப்பில் பேசினாா். இப்பயிற்சியில் விவசாயிகளுக்கு தொகுப்பு முதல் நிலை செயல் விளக்கத் திடல் திட்டத்தின் கீழ் எள் (டிஎம்வி-7) சான்றளிக்கப்பட்ட விதைகள் மற்றும் இதர உயிரி இடுபொருட்கள் விவசாயிகளுக்கு வழங்கப்பட்டன.பயிற்சியில் சுமாா் 30- க்கும் மேற்பட்ட விவசாயிகள் கலந்துகொண்டனா்.