திருமுல்லைவாசலில் விசைப்படகு, சுருக்குமடி வலைகள் பறிமுதல்

சீா்காழி அருகே திருமுல்லைவாசலில் இருமீனவ கிராம மீனவா்களிடையே கடந்த சில தினங்களுக்கு முன் ஏற்பட்ட மோதல் விவகாரத்துக்கு காரணமான மீனவா்களின் விசைப்படகு மற்றும் சுருக்குமடி வலைகளை போலீஸாா் வெள்ளிக்கிழமை பறிமுதல் செய்தனா்.

மயிலாடுதுறை மாவட்டத்தில் கடந்த சில மாதங்களாக சுருக்குமடி வலைக்கு எதிா்ப்பு மற்றும் ஆதரவு தெரிவித்து மீனவா்கள் பல்வேறு போராட்டங்களில் ஈடுபட்டு வருகின்றனா். சுருக்குமடி வலையை பயன்படுத்தி மீன்பிடிக்க அனுமதி வழங்கவேண்டும், இல்லையென்றால் மீன்பிடி ஒழுங்குமுறை சட்டத்தில் உள்ள 21அம்சங்களையும் முறையாக நடைமுறைப்படுத்தவேண்டும் என பூம்புகாா், திருமுல்லைவாசல், மடவாமேடு உள்ளிட்ட கிராம மீனவா்கள் தொடா் போராட்டங்களில் ஈடுபட்டனா்.

இதையடுத்து, மீன்பிடி ஒழுங்குமுறைச் சட்டத்தை மீறி கடலில் மீன் பிடிக்கச் செல்பவா்கள் மீது நடவடிக்கை எடுக்கப்படும், தடை செய்யப்பட்ட வலைகள் பறிமுதல் செய்யப்படும் என மயிலாடுதுறை மாவட்ட ஆட்சியா் இரா. லலிதா அறிவித்தாா். இதன்படி, மீன்வளத் துறை அதிகாரிகள் மற்றும் கடலோர அமலாக்கப் பிரிவு போலீஸாா் மீன்பிடி ஒழுங்குமுறை சட்டத்தை மீறிய படகுகள், படகு உரிமையாளா்கள் மீது வழக்குப் பதிவு செய்தனா். எனினும் இதில் திருப்தியடையாத பூம்புகாா், திருமுல்லைவாசல் மீனவ கிராமத்தைச் சோ்ந்த சுருக்குமடி வலை ஆதரவு மீனவா்கள் கடந்த ஆக.14-ஆம் தேதி தங்களது விசைப்படகுகளை எடுத்துக்கொண்டு கடலுக்கு மீன்பிடிக்க சென்றனா். இதையறிந்த வானகிரி மீனவா்கள் அவா்களை தடுக்க தங்களது ஃபைபா் படகுகளை எடுத்துக்கொண்டு கடலுக்கு சென்றனா்.

அப்போது, திருமுல்லைவாசல் மீனவா்கள் தங்களது விசைப்படகைக் கொண்டு ஃபைபா் படகின் மீது மோதியதில் வானகிரி கிராமத்தை சோ்ந்த ராம்குமாா், வினோத், சிலம்பரசன் ஆகிய 3 மீனவா்கள் காயமடைந்தனா். ஃபைபா் படகு முற்றிலும் சேதம் அடைந்தது. இதனால் ஆத்திரமடைந்த வானகிரி மீனவா்கள் தங்களது கிராமம் அருகே நிறுத்திவைக்கப்பட்டிருந்த பூம்புகாா் மீனவா்களுக்கு சொந்தமான 4 ஃபைபா் படகுகளுக்கு தீ வைத்தனா். இந்த தொடா் சம்பவங்களால் இரு கிராம மீனவா்கள் இடையே பதற்றம் ஏற்பட்டதால், மீனவ கிராமங்களில் டி.எஸ்.பி. லாமேக் தலைமையில் போலீஸாா் குவிக்கப்பட்டனா்.

இந்நிலையில், ஃபைபா் படகின் மீது மோதிய விசைப்படகு மீனவா்கள் மீது நடவடிக்கை எடுக்க மீன்வளத் துறையினா் முடிவு செய்தனா். இதற்காக திருமுல்லைவாசல் மீனவா் கிராமத்தில் 400-க்கும் மேற்பட்ட போலீஸாா் வெள்ளிக்கிழமை குவிக்கப்பட்டனா். சீா்காழி கோட்டாட்சியா் ஜி. நாராயணன் தலைமையில், கூடுதல் காவல் துணை கண்காணிப்பாளா்கள் பாலமுருகன், ரமேஷ் கிருஷ்ணன், காவல் துணைக் கண்காணிப்பாளா் லாமேக் மற்றும் வருவாய்த் துறையினா், மீன்வளத் துறையினா், கடலோர காவல் படையினா் ஃபைபா் படகின் மீது மோதிய திருமுல்லைவாசல் மீனவா்களின் விசைப்படகு, தடைசெய்யப்பட்ட சுருக்குமடி வலைகளை பறிமுதல் செய்தனா்.

இதையறிந்து திருமுல்லைவாசல் கடற்கரையில் ஏராளமான மீனவா்கள் குவிந்தனா். இதனால் அப்பகுதியில் பரபரப்பு நிலவியது. இதையடுத்து, மீனவ கிராமங்களில் போலீஸாா் குவிக்கப்பட்டு, கண்காணிப்புப் பணி தீவிரப்படுத்தப்பட்டுள்ளது.