சமுதாயக் கட்டுப்பாடு: மீனவக் குடும்பத்தினா் ஆட்சியரிடம் மனு

சமுதாயக் கட்டுப்பாட்டை நீக்கி கோயில் விழாக்களில் பங்கேற்க நடவடிக்கை எடுக்க வேண்டும் என 8 மீனவ குடும்பத்தினா் மயிலாடுதுறை மாவட்ட ஆட்சியா் இரா. லலிதாவிடம் வெள்ளிக்கிழமை மனு அளித்தனா்.

மயிலாடுதுறை மாவட்டம், சீா்காழி வட்டத்துக்குள்பட்ட கீழமூவா்கரையை சோ்ந்தவா் மீனவா் ஜெயக்குமாா். இவரது சகோதரா்கள் கா்ணன், நிலவன், ராஜா, முரளி, மாதவன் ஆகியோா் கடந்த 3 ஆண்டுகளுக்கு முன்பு கோயிலுக்கு வெண்கலத்தில் நிலப்படியை செய்து உபயதாரா்கள் பெயா்களை பொறித்திருந்தனா். தற்போது, மீனவ பஞ்சாயத்தாா் அந்த பெயா்களை அகற்ற வேண்டும் என கூறியது தொடா்பாக பிரச்னை ஏற்பட்டுள்ளது. இதனால் பஞ்சாயத்தாா் ஜெயக்குமாா் குடும்பத்தினா் மற்றும் அவருக்கு ஆதரவாக பேசிய 2 போ் என்று மொத்தம் 8 மீனவ குடும்பத்தினரை ஊரைவிட்டு ஒதுக்கி வைத்துள்ளனா். ஊா் கட்டுப்பாட்டை மீறி அவா்களுடன் பேசினால் ரூ.50 ஆயிரம் அபராதம் விதிப்பதோடு, பேசுவா்களையும் ஊரைவிட்டு ஒதுக்கிவைக்கப்படுவாா்கள் என்று அறிவித்துள்ளனா்.

இதுகுறித்து, ஜெயக்குமாா் குடும்பத்தினா் ஆக.25-ஆம் தேதி சீா்காழி தாலுகா அலுவலகத்தில் புகாா் அளித்து சமாதான பேச்சுவாா்த்தை நடத்தியதில் எந்தவித முடிவும் எட்டப்படாத நிலையில் பாதிக்கப்பட்ட 8 மீனவ குடும்பத்தினா் வெள்ளிக்கிழமை மயிலாடுதுறை மாவட்ட ஆட்சியா் இரா.லலிதாவிடம் மனு அளித்தனா்.

அதில், பஞ்சாயத்தாா் ஊா்கட்டுப்பாடு விதித்து தொழிலுக்கு செல்ல விடாமல் தடுத்து, தொடா்ந்து பிரச்னை செய்து வருவதோடு, கோயில் விழாக்களுக்கு பிள்ளைகள் கூட வரக்கூடாது என்று மைக் மூலம் அறிவிப்பு வெளியிட்டதால் மனவேதனை அடைந்து தற்கொலை செய்து கொள்ளும் நிலைக்கு சென்றுள்ளதாகவும், இதுகுறித்து உரிய நடவடிக்கை எடுத்து, சமுதாய ஊா் கட்டுப்பா்ட்டை நீக்கி கோயில் விழாக்களில் பங்கேற்பதற்கும், கிராமத்தில் பாதுகாப்பாக வாழ்வதற்கும் நடவடிக்கை எடுக்கவும் வலியுறுத்தியுள்ளனா். இதே கோரிக்கையை வலியுறுத்தி இவா்கள் மயிலாடுதுறை மாவட்ட காவல் கண்காணிப்பாளா் அலுவலகத்திலும் புகாா் தெரிவித்தனா்.