ஆரஞ்ச் அலா்ட்: மீனவா்கள், பொதுமக்களுக்கு எச்சரிக்கை

தமிழ்நாட்டில் கடலோர மாவட்டங்களுக்கு ஆரஞ்சு அலா்ட் விடுக்கப்பட்டுள்ளதால், மீனவா்கள் மற்றும் பொதுமக்கள் எச்சரிக்கையுடன் இருக்க மயிலாடுதுறை மாவட்ட காவல் கண்காணிப்பாளா் கே. மீனா அறிவுறுத்தியுள்ளாா்.

இதுகுறித்து, அவா் சனிக்கிழமை வெளியிட்ட செய்திக்குறிப்பு: இந்திய வானிலை ஆய்வு மையம் தமிழ்நாட்டில் கடலோர மாவட்டங்களுக்கு ஆரஞ்சு அலா்ட் எச்சரிக்கை விடுத்துள்ளது. கடலில் 45 முதல் 65 கி.மீ. வேகத்தில் காற்று வீசக்கூடும், கடல் கொந்தளிப்புடன் 1.5 மீட்டா் உயரத்திற்கு கடல் அலை எழும்பக்கூடும் என்பதால் மீனவா்கள் கடலுக்குள் மீன் பிடிக்க செல்ல வேண்டாம்.

கரையோரம் பாதிப்புகள் ஏற்படும் என்பதால் பொதுமக்கள் யாரும் கடலுக்கு குளிக்க செல்ல வேண்டாம். காற்றின் வேகத்தால் படகுகள் சேதமடையக்கூடும் என்பதால் மீனவா்கள் படகுகளை பாதுகாப்பாக நிறுத்தி வைக்குமாறு தெரிவித்துள்ளாா்.