மாவட்ட அரசு இசைப் பள்ளியில் நடைபெறவுள்ள கோடைகால  கலைப் பயிற்சியில் விருப்பமுள்ள சிறார் சேரலாம் எனத் தெரிவிக்கப்பட்டுள்ளது.
இதுகுறித்து, கலைப் பண்பாட்டுத் துறை இணை இயக்குநர் இரா. குணசேகரன் வெளியிட்ட செய்திக் குறிப்பு:
தமிழ்நாடு அரசு கலைப் பண்பாட்டுத் துறை, மண்டலக் கலைப் பண்பாட்டு மையம் ஆகியவை இணைந்து, மாவட்ட ஜவாஹர் சிறுவர் மன்றங்கள் மூலம் 5 வயது முதல் 16 வயது வரையுள்ள சிறாருக்கு குரலிசை, பரத நாட்டியம், ஓவியம், யோகா மற்றும் கராத்தே, சிலம்பம் போன்ற கலைப் பயிற்சிகளை  சனிக்கிழமை  மாலை 3 மணி முதல் 6 மணி வரையும், ஞாயிற்றுக்கிழமை காலை 9 மணி முதல் 12 மணி வரை, சீர்காழி மாவட்ட அரசு இசைப் பள்ளியில் அளித்துவருகிறது. இந்நிலையில், 2019-2020-ஆம் ஆண்டில் கோடை விடுமுறையை பயனுள்ள வகையில் கழிக்க சிறாருக்கு ஒவ்வொரு மாவட்ட ஜவாஹர் சிறுவர் மன்றங்களில் குரலிசை, பரத நாட்டியம், யோகா, ஓவியம் போன்ற பயிற்சிகள் அளிக்கப்படவுள்ளன. இப்பயிற்சி முகாம் 1.5.2019 முதல் 10.5.2019 வரை காலை 9 மணி முதல் பகல் 12 மணி வரை நடத்தப்படவுள்ளது. இப்பயிற்சி முகாமில் கலந்துகொள்ளும் அனைத்து மாணவ, மாணவியர்களுக்கும் சான்றிதழ்கள் முகாம் நிறைவு நாளில் வழங்கப்படும். 
இப்பயிற்சியில் சேர விருப்பமுள்ள சிறார், சீர்காழியில் இயங்கிவரும் மாவட்ட அரசு இசைப்பள்ளிக்கு மே 1- ஆம் தேதி காலை 9 மணிக்கு நேரில் வந்து கலந்துகொள்ளுமாறு கேட்டுக்கொள்ளப்படுகிறார்கள் என அதில் தெரிவிக்கப்பட்டுள்ளது.