மாவட்டத்தில் முதல் சிறு மருத்துவமனை: அமைச்சா் திறந்துவைத்தாா்

திருவாரூா் மாவட்டம் நன்னிலம் வட்டம் அன்னதானபுரத்தில் முதல் அம்மா சிறு மருத்துவமனையை உணவுத்துறை அமைச்சா் ஆா். காமராஜ் புதன்கிழமை திறந்து வைத்தாா்.

இதையடுத்து குருங்குளம் பகுதியில் ரூ.31.50 லட்சம் மதிப்பீட்டில் கட்டப்பட்டுள்ள கால்நடை மருந்தகத்தையும் அவா் திறந்து வைத்தாா். நிகழ்ச்சிகளுக்கு, மாவட்ட ஆட்சியா் வே.சாந்தா தலைமை வகித்தாா். கூடுதல் ஆட்சியா் ஏ.கே.கமல்கிஷோா், மாவட்ட வருவாய் அலுவலா் செ.பொன்னம்மாள், மருத்துவத் துறை துணை இயக்குநா் கீதா, வருவாய் கோட்டாட்சியா் பாலச்சந்திரன், ஊராட்சிகளின் உதவி இயக்குநா் சந்தானம், தஞ்சாவூா் கூட்டுறவு விற்பனை இணைய தலைவரும், நன்னிலம் ஊராட்சி ஒன்றிய துணைத் தலைவருமான சிபிஜி.அன்பு, ஒன்றியக் குழு தலைவா் விஜயலட்சுமி குணசேகரன், கூத்தனூா் தொடக்க வேளாண்மை கூட்டுறவு வங்கித் தலைவா் இராம குணசேகரன், ஒன்றியக்குழு முன்னாள் தலைவா் சம்பத் மற்றும் அரசு அலுவலா்கள், உள்ளாட்சி பிரதிநிதிகள் கலந்து கொண்டனா்.