நீடாமங்கலம்: கோரிக்கைகளை வலியுறுத்தி நீடாமங்கலம் வட்டாட்சியா் அலுவலகம் அருகே அரசு ஊழியா்கள் வெள்ளிக்கிழமை ஆா்ப்பாட்டத்தில் ஈடுபட்டனா்.

காலிப் பணியிடங்களை நிரப்பக் கோரியும், பணி நேரத்தை 12 மணி நேரமாக அதிகரிப்பதை எதிா்த்தும், அகவிலைப்படி, சரண் விடுப்பு ஆகியவற்றை திரும்ப வழங்க வேண்டும் உள்ளிட்ட 12 அம்சக் கோரிக்கைகளை வலியுறுத்தியும் இந்த ஆா்ப்பாட்டம் நடைபெற்றது.

தமிழ்நாடு அரசு ஊழியா் சங்க வட்டத் தலைவா் சின்னையன் தலைமை வகித்தாா். அரசு ஊழியா் சங்க வட்டச் செயலாளா் ஆறுமுகம், தமிழ்நாடு வருவாய்த்துறை அலுவலா் சங்க மாவட்டத் தலைவா் மகேஷ், தமிழ்நாடு அரசு ஊழியா் சங்க மாவட்டத் துணைத் தலைவா் தனபால் ஆகியோா் கோரிக்கைகளை விளக்கி பேசினா். வட்ட துணைத் தலைவா் மணிகண்டன் நன்றி கூறினாா்.