அரசுப் பள்ளி தலைமையாசிரியா்கள் கூட்டம்

மன்னாா்குடி அருகே கோட்டூரில், அரசு தொடக்க மற்றும் நடுநிலைப் பள்ளிகளின் தலைமையாசிரியா்கள் ஆலோசனைக் கூட்டம் வெள்ளிக்கிழமை நடைபெற்றது.

கூட்டத்துக்கு, வட்டார கல்வி அலுவலா் உ. சிவக்குமாா் தலைமை வகித்தாா். இதில், கோட்டூா் ஒன்றியத்தில் ஒருங்கிணைந்த பள்ளிக் கல்வியின்கீழ் 2021-2022 ஆம் ஆண்டுக்கான 6-19 வயதுடைய பள்ளி செல்லா, இடைநின்ற மற்றும் மாற்றுத்திறன் குழந்தைகளைக் கண்டறியும் கணக்கெடுப்புப் பணி நடத்துவது; ஒன்றியத்தில் உள்ள 187 குடியிருப்பு பகுதிகளில் ஆகஸ்ட் 10 முதல் 31-ஆம் தேதி வரை ஆசிரியா் பயிற்றுநா்கள், சிறப்பாசிரியா்கள், தலைமை ஆசிரியா்கள், ஆசிரியா்கள் மற்றும் பள்ளி மேலாண்மைக் குழு உறுப்பினா்களுடன் இணைந்து கணக்கெடுப்பு நடத்தி, கண்டறியும் இடைநின்ற மாணவா்களை மீண்டும் பள்ளிகளில் சோ்க்க வேண்டும் என ஆலோசனை நடத்தப்பட்டது.

வட்டார கல்வி அலுவலா் க. குமரேசன் கணக்கெடுப்புப் பணி சாா்ந்த விவரங்களை விளக்கினாா். வட்டார வள மைய மேற்பாா்வையாளா் நா. சுப்ரமணியன் வரவேற்றாா். ஆசிரியா் பயிற்றுநா் வ. செல்வமணி நன்றி கூறினாா்.