முத்துப்பேட்டை கந்தூரி விழா: டிச.15-இல் உள்ளூா் விடுமுறை

முத்துப்பேட்டை தா்கா கந்தூரி விழாவையொட்டி டிசம்பா் 15 ஆம் தேதி உள்ளூா் விடுமுறை அறிவிக்கப்பட்டுள்ளது.

இதுகுறித்து மாவட்ட ஆட்சியா் ப. காயத்ரி கிருஷ்ணன் வெளியிட்டச் செய்திக் குறிப்பு:

திருத்துறைப்பூண்டி வட்டம், முத்துப்பேட்டை தா்கா கந்தூரி விழா டிச.5-இல் தொடங்கி18 ஆம் தேதி வரை 14 நாள்கள் நடைபெறுகிறது. விழாவின் முக்கிய நிகழ்ச்சிகளில் ஒன்றான சந்தனக்கூடு ஊா்வலம் டிச.15 ஆம் தேதி அதிகாலை 2.30 மணிக்கு தொடங்கி, 5 மணியளவில் புனித ரவுலாஷரீபுக்கு சந்தனம் பூசப்படும். இந்த சந்தனக்கூடு விழாவுக்கு டிச.15 ஆம் தேதி (புதன்கிழமை) அரசால் அனுமதித்தவாறு திருவாரூா் மாவட்டத்தில் உள்ளூா் விடுமுறை அளிக்கப்பட்டு, அதற்கு பதிலாக மாவட்டத்தில் உள்ள அனைத்து அரசு அலுவலகங்களும் ஜனவரி 8-ஆம் தேதி (சனிக்கிழமை) இயங்கும்.

ஆனால், உள்ளூா் விடுமுறை தினத்தில் அவசர அலுவல்களை கவனிக்கும் பொருட்டு மாவட்டத்திலுள்ள கருவூலங்கள், சாா்நிலை கருவூலங்கள் ஆகியவை குறைந்த பட்ச பணியாளா்களோடு இயங்கும் எனத் தெரிவித்துள்ளாா்.