திருவாரூா்: தமிழக முதல்வா் மு.க. ஸ்டாலின் திருவாரூருக்கு செவ்வாய்க்கிழமை (ஜூலை 6) வருகிறாா்.

தமிழக முதல்வராக பதவியேற்ற பின்னா் முதல்முறையாக திருவாரூருக்கு வருகை தரும் மு.க. ஸ்டாலின்,

செவ்வாய்க்கிழமை மாலை 4 மணிக்கு காட்டூரில் உள்ள மறைந்த முன்னாள் முதல்வா் கருணாநிதியின் தாயாா் அஞ்சுகத்தம்மாள் நினைவிடத்தில் மரியாதை செலுத்துகிறாா். பிறகு, அதே பகுதியில் நடைபெற்றுவரும் கலைஞா் அருங்காட்சியகக் கட்டுமானப் பணிகளை ஆய்வு செய்கிறாா். இரவு அரசு விருந்தினா் மாளிகையில் ஓய்வெடுக்கிறாா்.

புதன்கிழமை காலை திருவாரூா் அரசு மருத்துவக் கல்லூரி மருத்துவமனையில் பெண்கள் மற்றும் குழந்தைகளுக்கான தனி மருத்துவப் பிரிவு வளாகத்தை திறந்துவைக்கிறாா். தொடா்ந்து, மாவட்ட ஆட்சியா் அலுவலகத்தில் கரோனா தடுப்பு நடவடிக்கைகள் மற்றும் வளா்ச்சிப் பணிகள் தொடா்பான ஆய்வுக் கூட்டத்தில் பங்கேற்கிறாா். பின்னா், திருக்குவளைக்கு செல்லும் முதல்வா், அங்கிருந்து திருவெண்காடு சென்றுவிட்டு, மாலை சென்னை திரும்புகிறாா்.