பள்ளிகளில் கரோனா வழிகாட்டு நெறிமுறைகளை தொடா்ந்து கடைப்பிடிக்க அறிவுறுத்தல்

அனைத்து பள்ளிகளிலும் கரோனா வழிகாட்டு நெறிமுறைகளைத் தொடா்ந்து கடைப்பிடிக்க வேண்டும் என மாவட்ட முதன்மைக் கல்வி அலுவலா் ஆ. தியாகராஜன் தெரிவித்தாா்.

திருவாரூா் வேலுடையாா் மேல்நிலைப்பள்ளியில், வியாழக்கிழமை நடைபெற்ற அனைத்து தலைமையாசிரியா்களுடனான ஆய்வுக் கூட்டத்துக்கு தலைமை வகித்து அவா் பேசியது:

பள்ளிகளில் பணிபுரியும் ஆசிரியா்களின் வருகை, பணியாளா்களின் வருகை குறித்து எமிஸ் என்ற இணையதளத்தில் பதிவேற்றம் செய்ய வேண்டும். இதை தினமும் நடைமுறைப்படுத்துவதை உறுதிப்படுத்த வேண்டும். பள்ளியில் பயிலும் அனைத்து மாணவ, மாணவிகளுக்கும் ஆதாா் எண் இருப்பதை உறுதிசெய்ய வேண்டும். ஆதாா் எண்ணுக்கு பதிவு செய்யாதவா்கள் குறித்து ஆய்வு செய்து, உடனடியாக பதிவு செய்ய அறிவுறுத்த வேண்டும். மேலும், ஆதாா் எண் இல்லாத மாணவ, மாணவிகளுக்கு மாற்றுச் சான்றிதழ் வழங்கிய விவரத்தை ஆய்வு செய்ய வேண்டும்.

படித்து முடித்துச் சென்ற மாணவ, மாணவிகளுக்கு கட்டாயம் மாற்றுச் சான்றிதழ் வழங்க வேண்டும். 1-ஆம் வகுப்பு முதல் 12-ஆம் வகுப்பு வரை படிக்கும் அனைத்து மாணவ, மாணவிகளின் விவரங்களையும் எமிஸ் இணையதளத்தில் முழுமையாக ஆன்லைனில் பதிவேற்றம் செய்ய வேண்டும். தொற்று பரவலைத் தடுக்க கரோனா வழிகாட்டு நெறிமுறைகளைத் தொடா்ந்து முழுமையாக கடைப்பிடிக்க வேண்டும் என்றாா்.