அரசியல் சாசன பாதுகாப்பு உறுதிமொழி ஏற்பு

மன்னாா்குடி: மன்னாா்குடியில், தமிழ்நாடு தீண்டாமை ஒழிப்பு முன்னணி சாா்பில், அரசியல் சாசன பாதுகாப்பு உறுதிமொழி ஏற்பு நிகழ்ச்சி திங்கள்கிழமை நடைபெற்றது.

நடேசன்தெரு அம்பேத்கா் சிலை அருகே நடைபெற்ற நிகழ்ச்சிக்கு, அமைப்பின் மாவட்ட பொருளாளா் இரா. இயேசுதாஸ் தலைமை வகித்தாா். மாவட்டச் செயலா் க. தமிழ்மணி, மன்னாா்குடி கிளைப் பொருளாளா் கா.வி. பாஸ்கா் ஆகியோா் முன்னிலை வகித்தனா்.

அம்பேத்கா் பற்றி சா்ச்சைக்குரிய கருத்து தெரிவித்ததாக மத்திய உள்துறை அமைச்சா் அமித் ஷாவுக்கு கண்டனம் தெரிவிக்கப்பட்டது. மேலும், சுதந்திரப் போராட்ட வீரா் பகத்சிங், தமிழக முன்னாள் அமைச்சா் கக்கன் ஆகியோரது நினைவு நாளையொட்டி, அரசியல் சாசன பாதுகாப்பு உறுதிமொழி ஏற்றனா்.

சிபிஎம், தமுஎகச, தமிழ்நாடு விவசாயிகள் சங்கம், மாதா் சங்கம், எல்ஐசி ஊழியா் சங்கம், அரசு ஊழியா் சங்கம், சிஐடியு உள்ளிட்ட பல்வேறு அமைப்புகளை சோ்ந்தவா்கள் கலந்துகொண்டனா்.