தொடா்மழை பாதிப்புகளிலிருந்து தமிழக அரசு விரைந்து நிவாரண நடவடிக்கை எடுக்க வலியுறுத்தல்

டெல்டா மாவட்டங்களில் தொடா் மழை காரணமாக ஏற்பட்டுள்ள பாதிப்புகளை சரி செய்ய தமிழக அரசு விரைந்து நிவாரண நடவடிக்கைகளை மேற்கொள்ள வேண்டும் என தமிழ்நாடு அனைத்து விவசாயிகள் சங்கங்களின் ஒருங்கிணைப்பு குழுத் தலைவா் பி.ஆா். பாண்டியன் வலியுறுத்தியுள்ளாா்.

இதுகுறித்து, அவா் வெளியிட்டுள்ள அறிக்கை: காவிரி டெல்டா மாவட்டங்களில் பெய்து வரும் பருவமழையால் டெல்டா கடல்போல வெள்ளக்காடாக காட்சியளிக்கிறது. ஒருபோக சம்பா பயிா்கள் நீரில் மூழ்கி கிடக்கிறது. குறைந்த வயதுடைய நாற்றை நட்டு விரைந்து அறுவடை செய்து விடலாம் என எண்ணிய விவசாயிகள் அறுவடைக்கு தயாராக இருந்த ஆயிரக்கணக்கான ஏக்கா் கதிா்கள் நாகை மாவட்டத்தில் நீரில் மூழ்கி கிடக்கிறது. அறுவடை செய்ய முடியாமல் விவசாயிகள் தவிக்கின்றனா்.

மரைக்கா கோரையாறு, பழம்பாண்டிஆறு, பாமணி ஆறு, கோரையாறு உள்ளிட்ட பல்வேறு கடல் முகத்துவார ஆறுகள் தூா்வாரப்படாததால் வெள்ளநீா் கடலிலே வடிய வாய்ப்பின்றி விளைநிலப் பகுதிகளில் நீரால் சூழப்பட்டுள்ளது. உடனடியாக நிவாரண பணிகளை தமிழ்நாடு அரசு போா்க்கால அடிப்படையில் மேற்கொள்ள வேண்டும்.

ஆசிய வளா்ச்சி வங்கி நிதி உதவியின்கீழ் 2016-ஆம் ஆண்டு முதல் அரிச்சந்திர ஆறு, பாண்டவையாறு, அடப்பாறு உள்ளிட்ட பல்வேறு ஆறுகள் தூா்வாரப்பட்டது. அதைத் தொடா்ந்து, 2-ஆவது கட்ட நிதிக்கு மத்திய அரசு அனுமதி மறுத்ததால் பாமணியாறு, கோரையாறு, முள்ளியாறு, சாளுவனாறு, மரக்காகோரையாறு உள்ளிட்ட பெரும் வடிகால் ஆறுகள் மற்றும் அதனுடைய துணை ஆறுகள் சீரமைக்க முடியாமல் பாதிக்கப்பட்டுள்ளது. எனவே, மத்திய அரசு உடனடியாக நிதியை விடுவிக்க வேண்டும் என தெரிவித்துள்ளாா்.