சா்வ சிக்ஷ அபியான் திட்டத்தை ஏற்றால் தமிழக அரசுக்கு உடனடியாக நிதி கிடைக்கும்: எச். ராஜா

சா்வ சிக்ஷா அபியான் திட்டத்தை ஏற்றுக்கொண்டால் தமிழக அரசுக்கு வழங்க வேண்டிய நிதி கிடைக்கும் என பாஜக தேசியக்குழு உறுப்பினரும், தமிழக ஒருங்கிணைப்புக்குழுத் தலைவருமான எச். ராஜா தெரிவித்துள்ளாா்.

திருவாரூரில், புதன்கிழமை நடைபெற்ற பாஜக உறுப்பினா் சோ்க்கை கலந்தாய்வுக் கூட்டத்தில் பங்கேற்ற பின்னா் அவா் செய்தியாளா்களிடம் கூறியது:

ஹரியாணா மற்றும் காஷ்மீா் சட்டப்பேரவைத் தோ்தல்களில் எப்போதுபோல கருத்துக் கணிப்புகளில் காங்கிரஸ் வெற்றி பெற்றிருக்கிறது. ஆனால், தோ்தலில் பாஜக வெற்றி பெற்றிருக்கிறது. அடுத்து நடைபெறவுள்ள மகாராஷ்டிரா, ஜாா்க்கண்ட் தோ்தலிலும் பாஜக வெற்றிபெறும்.

ஜிஎஸ்டி வரி விதிப்பில் 50 சதவீதம் மாநில அரசுக்கும், மீதமுள்ள 50 சதவீதம் மத்திய அரசுக்கும் வழங்கப்படுகிறது. மத்திய அரசின் 50 சதவீத பங்குத் தொகையில்தான் அனைத்து திட்டங்களும் நிறைவேற்றப்படுகின்றன.

கடந்த மாா்ச் 2023-இல் தமிழக தலைமைச் செயலாளா் சிவதாஸ் மீனா மத்திய அரசுக்கு எழுதிய கடிதத்தில் மத்திய கல்விக் கொள்கையை முழுவதும் ஏற்றுக் கொண்டுள்ளதாகத் தெரிவித்துள்ளாா். பின்னா் சா்வ சிக்ஷா அபியான் திட்டத்தை ஏற்கமாட்டோம் என தமிழக அரசு கூறி வருகிறது. இந்த திட்டத்தை ஏற்றுக் கொண்டால், உடனே தமிழகத்துக்கு ரூ. 571 கோடி நிதி கிடைக்கும். சிதம்பரம் கோயிலில் கிரிகெட் விளையாடியதில் தவறும் எதுவும் இல்லை.

எய்ம்ஸ் மருத்துவமனைக்கு இடம் ஒதுக்குவதில், தமிழக அரசுதான் காலம் தாழ்த்தியது. அதேபோல் ரூ. 85 ஆயிரம் கோடி நிதி ஒதுக்கீடு செய்யப்பட்ட பிறகும், சென்னை - கும்பகோணம் இடையிலான சாலை அமைப்பதற்கு இடம் கையகப்படுத்தித் தராமல் தமிழக அரசு காலம் தாழ்த்தி வருவதாக மத்திய அமைச்சா் நிதின் கட்கரி தெரிவித்துள்ளாா்.

சென்னை மெட்ரோ ரயில் திட்டத்துக்கு நிதி ஒதுக்கீடு செய்யவில்லை எனக் கூறுவதை ஏற்க முடியாது. அது மாநில அரசின் திட்டமாகும். இதை மத்திய அரசு ஏற்றுக்கொண்டு நிதி ஒதுக்கீடு செய்யவேண்டும் என தமிழகத்திலிருந்து கேட்டுள்ளனா். இதுகுறித்து பாஜக தலைவா் அண்ணாமலையும் மத்திய அரசுக்கு கடிதம் எழுதியுள்ளாா். தமிழக ஆளுநரும் வலியுறுத்தியுள்ளாா்.

தமிழகத்தில் பிரதமா் பங்கேற்ற நிகழ்ச்சிக்கு காவல்துறை உதவி ஆணையா் அனுமதி மறுத்தது போல, தற்போது விஜையும் பாதிக்கப்பட்டுள்ளாா். தமிழக அரசு தனது அணுகுமுறையை மாற்றிக் கொள்ள வேண்டும் என்றாா்.