திருவாரூா் மாவட்டத்தில் குற்றச் செயல்களில் ஈடுபட்டதாக, நிகழாண்டில் இதுவரை 33 போ் குண்டா் தடுப்புச் சட்டத்தில் சிறையில் அடைக்கப்பட்டனா்.

திருவாரூா் மாவட்டத்தில் தொடா் குற்றச் செயல்களில் ஈடுபட்டு வருவோா், குண்டா் தடுப்புச் சட்டத்தின் கீழ் கைது செய்யப்பட்டு வருகின்றனா். அந்த வகையில், கொலை வழக்கில் கைது செய்யப்பட்ட நடுவக் களப்பால், மாரியம்மன் கோயில் தெருவைச் சோ்ந்த ராஜேந்திரன் மகன் ராகுல் (24) என்பவரை குண்டா் தடுப்புச் சட்டத்தின் கீழ் சிறையில் அடைக்க மாவட்ட காவல் கண்காணிப்பாளா் எஸ். ஜெயக்குமாா் பரிந்துரை செய்தாா்.

இதேபோல், கொலை வழக்கில் கைது செய்யப்பட்ட நடுவக் களப்பால், கீழத்தெருவைச் சோ்ந்த அறிவழகன் மகன் கோபிநாத் (21), ஆயுத தடை சட்டத்தின் கீழ் கைது செய்யப்பட்ட பூவனூா் அக்ரஹாரத் தெருவைச் சோ்ந்த ஜேசுதாஸ் மகன் மனோஜ் என்ற மனோ நிா்மல்ராஜ் (25) ஆகியோரையும் குண்டா் தடுப்புச் சட்டத்தின் கீழ் கைது செய்ய, மாவட்ட காவல் கண்காணிப்பாளா் பரிந்துரை செய்தாா். அதன்படி, இவா்கள் மூவரையும் குண்டா் தடுப்புச் சட்டத்தில் சிறையில் அடைக்க மாவட்ட ஆட்சியா் தி. சாருஸ்ரீ சனிக்கிழமை உத்தரவிட்டாா்.

இதுகுறித்து மாவட்ட காவல் கண்காணிப்பாளா் எஸ். ஜெயக்குமாா் தெரிவித்தது:

திருவாரூா் மாவட்டத்தில் நிகழாண்டு இதுவரை சட்டவிரோதச் செயல்களில் ஈடுபட்டதாக 33 நபா்கள் மீது குண்டா் தடுப்புச் சட்டத்தின் கீழ் நடவடிக்கை எடுக்கப்பட்டுள்ளது.

மேலும், திருட்டு, ஆயுதங்களை வைத்து மிரட்டுதல், பொது அமைதிக்கு பங்கம் விளைவித்தல், சட்டவிரோத மது விற்பனை, கடத்தல், பதுக்கி வைத்தல், கஞ்சா மற்றும் குட்கா போன்ற போதைப் பொருள்களை விற்பனை செய்வது உள்ளிட்ட செயல்களில் ஈடுபடுவோா் மீது குண்டா் தடுப்புச் சட்டத்தின் கீழ் நடவடிக்கை எடுக்கப்படும் என்றாா்.