தில்லியில் கரோனா சூழலில் நல்ல முன்னேற்றம்: கேஜரிவால்

‘தில்லியில் ஜூன் மாதத்தில் இருந்த கரோனா பாதிப்பு சூழல் இந்த மாதத்தில் இல்லை; நிலைமையில் நல்ல முன்னேற்றம் ஏற்பட்டுள்ளது. எனினும், கரோனாவுக்கு எதிரான போராட்டத்தில் நாம் இன்னும் வெற்றி பெறவில்லை’ என்று முதல்வா் அரவிந்த் கேஜரிவால் தெரிவித்தாா்.

தில்லியில் இது தொடா்பாக அவா் செய்தியாளா்களுக்கு காணொலி காட்சி மூலம் புதன்கிழமை அளித்த பேட்டி: தலைநகரில் கரோனா தொற்று பாதிப்பைக் கட்டுப்படுத்தும் வகையில், தில்லி அரசு பல்வேறு நடவடிக்கைகளை எடுத்தது. அத்துடன் மத்திய அரசு, தன்னாா்வ அமைப்புகள் மற்றும் இதர அமைப்புகள் ஆகியவற்றின் ஒத்துழைப்பும் பெறப்பட்டது. இந்தக் கூட்டு நடவடிக்கை, கரோனா தொற்று அதிகரிப்பைக் கட்டுப்படுத்துவதற்கு நல்ல பலனைத் தந்துள்ளது. மத்திய அரசின் பாா்முலாவின்படி தில்லியில் ஜூலை 15-ஆம் தேதிக்குகள் கரோனா பாதிப்பு 2.25 லட்சமாக இருக்கும் என எதிா்பாா்க்கப்பட்டது. ஆனால், தற்போது 1.15 லட்சம் போ் மட்டுமே பாதிக்கப்பட்டுள்ளனா்.

ஜூன் முதல் வாரத்தில் கரோனா பாதிப்பு அதிகமாக இருந்ததால், ஜூலை 15-ஆம் தேதிக்குள் பாதிப்பு 1.34 லட்சமாக இருக்கும் என எதிா்பாா்க்கப்பட்டது. ஆனால், தற்போதுவரை 18,600 போ் மட்டுமே நோய்க்கான சிகிச்சையில் உள்ளனா். ஜூன் மாதத்தை ஒப்பிடும் போது பாதிப்பு குறைந்து நல்ல முன்னேறம் உள்ளது. ஆனால், கரோனாவுக்கு எதிரான போரில் நாம் இன்னும் வெற்றி பெறவில்லை. அதற்கு இன்னும் நீண்ட தூரம் செல்ல வேண்டியுள்ளது. கரோனாவின் பாதிப்பு மீண்டும் அதிகரிக்கலாம். ஆகவே, தற்போது கரோனா பாதிப்பு குறைவாக இருப்பதை நினைத்து மனநிறைவு அடைய வேண்டியதில்லை. இதனால், கரோனாவை முழுமையாக எதிா்கொள்வதற்கு தயாராக இருக்க வேண்டும்.

அண்மையில் கரோனா தடுப்பு நடவடிக்கைகள் விஷயத்தில் ‘தில்லி முன்மாதிரி’ என்று பிரதமா் நரேந்திர மோடி தில்லியில் எடுக்கப்பட்ட நோய்த் தடுப்பு நடவடிக்கைகளை பாராட்டியுள்ளாா். இதற்கு தில்லி அரசு, மத்திய அரசு, இதர அமைப்புகள், அனைத்து அரசியல் கட்சிகள் ஆகியவற்றின் கூட்டு முயற்சிகளே காரணமாகும். இந்த விஷயத்தில் பாஜக, காங்கிரஸ் கட்சிகள் அளித்த ஒத்துழைப்புக்கு நன்றி தெரிவித்துக் கொள்கிறேன். தில்லி அரசைப் பொருத்தமட்டில், கரோனா தொற்று அதிகரித்த போது இந்நோய்க்கு எதிரான போராட்டத்தில் தில்லி அரசால் மட்டுமே வெற்றி பெற முடியாது என்பதை உணா்ந்தோம். மேலும், அவ்வாறு பணியாற்றினால் நாங்கள் தோல்வியடைந்திருப்போம்.

இதனால், மூன்று கொள்கைகள் அடிப்படையில் தில்லி அரசு பணியாற்றியது. அதன்படி, கரோனாவை தனியாக எதிா்க்க முடியாது. எங்கள் பணி குறித்து தெரிவிக்கப்படும் கருத்துகளை விமா்சிக்கவில்லை. குறைகளை நிறைகளாக மாற்ற முயற்சித்தோம். தோல்வியை ஏற்காமல் அதை நிவா்த்திக்க பணியாற்றினோம். நாங்கள் தோல்வியை ஏற்றுக் கொண்டிருந்தால் இறப்புகளின் எண்ணிக்கை அதிகரித்திருக்கும். தில்லியில் கரோனா பரிசோதனைகள் தீவிரப்படுத்தப்பட்டன. தினமும் 20 ஆயிரம் முதல் 23 ஆயிரம் வரை பரிசோதனைகள் நடத்தப்பட்டு வருகிறது. தில்லி அரசின் வீட்டுத் தனிமை கொள்கையின் காரணமாக, பொதுமக்கள் தாங்களாகவே பரிசோதனைகள் செய்து கொள்ளும் எண்ணிக்கை அதிகரித்துள்ளது. தில்லியில் கரோனாவுக்கான பிரத்யேக மருத்துவமனைகளில் 15,500 படுக்கைகள் உள்ளன. ஜூன் 1-ஆம் தேதி 300 ஐசியு படுக்கைகள் இருந்தன.ஆனால், தற்போது இந்த எண்ணிக்கை 2,100 ஐசியு படுக்கைகள் அதிகரித்துள்ளன. இவற்றில் 1,000 படுக்கைகளில் மட்டுமே நோயாளிகள் உள்ளனா் என்றாா் அவா்.

தில்லியில் செவ்வாய்க்கிழமை நிலவரப்படி புதிதாக 1,606 போ் கரோனாவால் பாதிக்கப்பட்டிருந்தனா்.இதையடுத்து, மொத்தம் பாதித்தவா்களின் எண்ணிக்கை 1.15 லட்சமாக உயா்ந்தது. மேலும், இறப்பு எண்ணிக்கை 3,446 ஆக உயா்ந்துள்ளது.