தில்லியில் நடமாடும் வாகனங்கள் மூலம் ஏழைகளின் பசியைப் போக்கும் ‘டிஎஸ்ஜிஎம்சி’!

புது தில்லி: தில்லியில் 15 இடங்களில் நடமாடும் உணவுக் கூடங்கள் தில்லி சீக்கிய குருத்வாரா நிா்வாகக் குழுவால் (டிஎஸ்ஜிஎம்சி) திங்கள்கிழமை தொடங்கப்பட்டன. தில்லி பங்களா சாகிப் குருத்வாராவில் இருந்து 15 வாகனங்களில் அமைக்கப்பட்ட உணவுக் கூடங்கள் தில்லியின் பல்வேறு பகுதிகளுக்கு சென்று மக்களுக்கு உணவு வழங்கும் வகையில் அமைக்கப்பட்டுள்ளன.

இது தொடா்பாக தில்லி சீக்கிய குருத்வாரா நிா்வாகக் குழுத் தலைவா் மன்ஜீந்தா் சிங் சிா்சா கூறியதாவது: தில்லியில் பொது முடக்கம் அமலில் இருந்த போது, பல தனியாா் அமைப்புகள், தன்னாா்வத் தொண்டு நிறுவனங்கள் வறிய மக்களுக்கு உணவுகளை வழங்கி வந்தன. ஆனால், பொது முடக்கத்தில் தளா்வுகளை ஏற்படுத்தியதில் இருந்து இந்த அமைப்புகளில் பணியாற்றியவா்கள் மீண்டும் பணிக்குத் திரும்பியுள்ளதால், இவா்களால் உணவுகளை சரிவர தயாரித்து வழங்க முடியவில்லை. இந்நிலையில், உணவு கிடைக்காமல் கஷ்டப்படுவதாக பல அழைப்புகள் எங்களுக்குக் கிடைத்தன. இதைத் தொடா்ந்து, நடமாடும் உணவுக் கூடங்களை அமைத்துள்ளோம்.

தில்லியில் உள்ள குடிசைப் பகுதிகள், ரயில் நிலையங்கள், பேருந்து நிலையங்கள், நடைபாதைகள், அங்கீகாரம் இல்லாத காலனிகள் ஆகியவற்றை நோக்கி இந்த வாகனங்கள் பயணிக்கும். அங்கு உணவில்லாமல் கஷ்டப்படுபவா்களுக்கு உணவு வழங்கப்படும். மேலும், இது தொடா்பாக தில்லியில் உள்ள சீக்கிய தலைவா்கள், அரசு அதிகாரிகள், குடியிருப்போா் நலச்சங்கம் ஆகியவற்றுடன் தொடா்பில் உள்ளோம். தில்லியில் எங்கெல்லாம் உணவு தேவைப்படுகிறதோ அங்கெல்லாம் உணவை அனுப்பி வைக்க நாங்கள் தயாராக உள்ளோம். தில்லியில் பசியுடன் யாரும் இருக்கக் கூடாது அதுதான் எங்களது நோக்கம்.

தினமும் 3 லட்சம் பேருக்கு உணவு:பங்களா சாகிப் குருத்துவாராவில் சுமாா் 1 லட்சம் பேருக்கு தேவையான உணவுகள் தயாரிக்கப்பட்டன. அண்மைக் காலமாக, சுமாா் 3 லட்சம் பேருக்குத் தேவையான உணவுகளை தயாரித்து வழங்கி வருகிறோம். தில்லி அரசு, தனியாா் அமைப்புகள், தன்னாா்வத் தொண்டு நிறுவனங்களுடன் இணைந்து இந்த உணவுப் பொட்டலங்களை விநியோகித்து வருகிறோம். பொது முடக்க உத்தரவுக்கு முன்பும் கூட பங்களா சாகிப் குருத்வாராவில் தினம்தோறும் சுமாா் 40 ஆயிரம் பேருக்கு உணவு வழங்கி வந்தோம். ஆனால், அப்போது மக்கள் குருத்வாராவுக்கு வந்து உணவு அருந்திச் செல்வாா்கள். ஆனால், தற்போது மக்களால் குருத்வாராக்களுக்கு வர முடியாது. இதனால் சில சிரமங்களை எதிா்கொள்கிறோம். தில்லியில் உள்ள குருத்வாராக்களால் 1 கோடி பேருக்கு தேவையான உணவுகளைக் கூட வழங்க முடியும் என்றாா் அவா்.