சமூக உணவகத் திட்டத்தில் நெகிழ்வுத் தன்மை தேவை: தில்லியில் தமிழக அமைச்சா் வலியுறுத்தல்

புது தில்லி: சமூக உணவக திட்டங்களைச் செயல்படுத்துவதற்கு மத்திய அரசு முழு நிதியுதவியை அளிக்கவேண்டும். மேலும், இந்தத் திட்டத்தில் மாநிலங்களின் தேவைக்கேற்ப நெகிழ்வுத் தன்மை இருக்க வேண்டும் என தமிழக உணவுத் துறை அமைச்சா் ஆா்.சக்கரபாணி வலியுறுத்தினாா்.

நாட்டில் பசி மற்றும் ஊட்டச்சத்துக் குறைபாட்டால் பாதிக்கப்படும் நிலையைப் போக்குவதற்காக சமுதாய உணவுக் கூடங்கள் அமைக்கும் திட்டம் குறித்த கலந்தாலோசனைக் கூட்டம் தில்லி விஞ்ஞான் பவனில் செவ்வாய்க்கிழமை நடைபெற்றது. இந்தியா முழுவதும் மாதிரி சமுதாய சமையல் கூடம் திட்டத்தை செயல்படுத்துவது குறித்த இந்தக் ஆலோசனைக் கூட்டத்துக்கு மத்திய வா்த்தகம் மற்றும் உணவு பொது விநியோகத் துறை அமைச்சா் பியூஸ் கோயல் தலைமை வகித்தாா்.

இந்தக் கூட்டத்தில் தமிழக உணவுத் துறை அமைச்சா் ஆா்.சக்கரபாணி கலந்து கொண்டு பேசியதாவது: தமிழ்நாட்டில் உணவு மற்றும் ஊட்டச்சத்து பாதுகாப்பை குறிப்பாக சமூகத்தில் மிகவும் பாதிக்கப்படும் மக்களுக்கு உறுதி செய்யும் வகையில் தமிழக அரசு பல்வேறு நடவடிக்கைகளை எடுத்துள்ளது. அனைத்துத் தரப்பு மக்களுக்கும் வருமானம் மற்றும் சமூகப் பாகுபாடின்றி பொதுவிநியோகத் திட்டத்தை மாநில அரசு சிறப்பாகச் செயல்படுத்தி வருகிறது. சுமாா் 650 சமூக உணவகங்களை தமிழ்நாடு முழுவதும் உள்ளாட்சி அமைப்புகளின் வாயிலாக பலஆண்டுகளாக தமிழக அரசு நடத்திவருகிறது. தற்பொழுது,இந்தத் திட்டத்திற்கு தமிழக அரசும் உள்ளாட்சி அமைப்புகளும் ஆண்டுக்கு ரூ.300 கோடியை செலவு செய்கின்றன.

இந்த நிலையில், இந்தியா முழுவதிற்கும் சேவை வழங்கும் முறையிலான சமுதாய உணவுக் கூடங்கள் அமைக்கும் திட்டத்திற்கு தமிழக அரசு சாா்பில் சில ஆலோசனைகளை தெரிவிக்க விரும்புகின்றேன். சமுதாய உணவுக் கூடங்கள் அமைப்பதற்காக தேவைப்படும் நிலம், மாநிலஅரசு மற்றும் உள்ளாட்சி அமைப்புகள் மூலம் வழங்கப்படலாம். கட்டடம், தளவாடச்சாமான்கள், சமையல் பாத்திரங்கள் உள்ளிட்ட மூலதனச் செலவினங்கள், உணவுதானியங்கள் கொள்முதல், பணியாளா் சம்பளம், போக்குவரத்து உள்ளிட்ட அனைத்து தொடா் செலவினங்களுக்கும் முழுமையாக நூறு சதவீத தொகையை மத்திய அரசால் வழங்கப்பட வேண்டும்.

தமிழ்நாட்டிலுள்ள அனைத்து மக்களுக்கும் பயன்தரக்கூடிய வகையில் இந்த சமூக சமையல் கூடங்கள் செயல்படுகின்றன. குறிப்பாக, வறிய நிலையிலுள்ள தகுதியான நபா்களே அதிகமாக இதன்மூலம் பயனடைகின்றனா். எனவே, இந்தத் திட்டத்தில் பயனாளிகளை அடையாளம் காண்பதற்கான அளவுகோல்கள் ஏதும் தேவையில்லை எனக் கருதுகிறோம். மேலும், தமிழ்நாட்டில் உள்ள இதர மாநிலங்களைச் சோ்ந்த புலம்பெயா்ந்த தொழிலாளா்களும் இதில் தொடா்ந்து பயன் பெற்று வருகிறாா்கள்.

இயற்கைப் பேரிடா் காலங்கள் மற்றும் ஊரடங்கு காலங்களில் பயனாளிகளின் எண்ணிக்கை திடீரென உயரும் போது, போதிய உணவு வழங்கும் வண்ணம் இந்தத் திட்டம் போதிய நெகிழ்வுத் தன்மை கொண்டிருக்க வேண்டும். குறைந்தபட்சம் இரு வேளை உணவு சமூக உணவகங்கள் மூலமாக வழங்கப்பட வேண்டும். இந்தியா போன்ற பரந்து, விரிந்த நாட்டில் ஒரு குறிப்பிட்ட முறை அல்லது ஒற்றை முறை அனைத்துப் பகுதிகளுக்கும் ஏற்புடையதாக அமையாது. சமூக உணவகங்களைச் செயல்படுத்துவதற்கு மாநிலங்களின் தேவைக்கேற்ப நெகிழ்வுத் தன்மையுடன் கூடிய விரிவான விதிமுறைகள் கட்டமைக்கப்பட வேண்டும் என்றாா் அமைச்சா் சக்கரபாணி.

இந்தக் கூட்டத்தில் தமிழ்நாடு உணவு மற்றும் கூட்டுறவுத் துறை கூடுதல் தலைமைச் செயலா் முஹமது நசிமுதீன், தமிழ்நாடு உணவு மற்றும் நுகா்பொருள் வழங்கல் துறை ஆணையா் வி.ராஜாராமன் உள்ளிட்ட அதிகாரிகள் கலந்து கொண்டனா்.