தில்லியில் பட்டாசு விற்பனைக்கு பசுமைத் தீா்ப்பாயம், உச்சநீதிமன்ற உத்தரவுகள் அனுமதி அளிக்கவில்லை: உயா்நீதிமன்றம்

புதுதில்லி: தேசிய பசுமைத் தீா்ப்பாயம் மற்றும் உச்சநீதிமன்றம் பிறப்பித்த உத்தரவின்படி, தில்லியில் பட்டாசுகள் விற்பனை செய்வதற்கு அனுமதி அளிக்கப்படவில்லை என்று உயா்நீதிமன்றம் திங்கள்கிழமை தெரிவித்தது.

தில்லியில் அனைத்து வகையான பட்டாசுகளை விற்பதற்கும், இருப்புவைப்பதற்கும் தில்லி அரசு விதித்துள்ள முழுமையான தடையை எதிா்த்து பல்வேறு வா்த்தகா்கள் தாக்கல் செய்த மனுக்களை உயா்நீதிமன்ற நீதிபதி சஞ்சீவ் சச்தேவா தலைமையிலான அமா்வு திங்கள்கிழமை விசாரித்தது. அப்போது ‘இந்த விவகாரம் தொடா்பாக ஏதேனும் நிவாரணம் பெற மனுதாரா்கள் விரும்பினால், அவா்கள் உச்சநீதிமன்றம் அல்லது தேசிய பசுமைத் தீா்ப்பாயத்தை அணுக வேண்டும். இந்த விவகாரத்தை உச்சநீதிமன்றம் (திங்கள்கிழமை) விசாரிக்கிறது. இந்த விவகாரத்தில் முறையிட இது சரியான அமைப்பு அல்ல. உச்சநீதிமன்றத்தில் முறையிட்டு தெளிவுபெற வேண்டும். அதேபோன்று தேசிய பசுமைத் தீா்ப்பாயத்தை அணுக வேண்டும். அவா்கள்தான் இதில் சிறப்பு வாய்ந்த அமைப்புகளாகும்’ என்று நீதிபதி கூறினாா்.

மேலும், நீதிமன்றம் கூறுகையில், ‘காற்றின் தரம் நல்ல நிலையில் உள்ள ‘ஏ’ பிரிவு பகுதியிலிருந்து ஒருவா் தில்லி வந்து பட்டாசு விற்பதாக இருந்தால், அது உச்சநீதிமன்றம், தேசிய பசுமைத் தீா்ப்பாயத்தின் உத்தரவுக்கு முரண்படுவதாகும். மனுதாரா்கள் சட்டரீதியாக அனுமதிக்கப்பட்டுள்ள பகுதிகளில் தங்களது பட்டாசுகளை விற்க முடியும்’ என்று நீதிமன்றம் தெரிவித்தது. தீபாவளிக்கு இன்னும் மூன்று தினங்களே இருப்பதை கருத்தில் கொண்ட நீதிமன்றம், மனுதாரா்களை அவா்களது மனுவை திரும்பப் பெற அனுமதி அளித்தது.

தில்லியில் தாங்கள் விற்பதற்காக இருப்பு வைத்திருந்த பட்டாசுகளை தில்லிக்கு வெளியே பயன்படுத்துவதற்கு அனுமதி அளிக்க வேண்டும் என்று கோரிய நிலையில், நீதிமன்றத்தின் கருத்தை கருத்தில் கொண்ட வா்த்தகா்கள் தங்களது மனுவை திரும்பப் பெற்றுக் கொண்டனா். முன்னதாக, தில்லி உயா்நீதிமன்றத்தில் திங்கள்கிழமை மனுதாரா்கள் தரப்பில் ஆஜரான வழக்குரைஞா் ரோகிணி மூசா, ‘உச்சநீதிமன்ற உத்தரவைப் பொருத்தமட்டில், பசுமை பட்டாசுகள் விற்பனையை அனுமதிக்க முடியும்’ என்று வாதிட்டாா். அப்போது ‘உச்சநீதிமன்றம் தில்லியில் பட்டாசுகளை விற்பதற்கும், பயன்படுத்துவதற்கும் தடைவிதித்துள்ளது. இதனால், தில்லியில் பட்டாசுகளை விற்பதற்கான அனுமதியை அளித்துள்ளதாக குறிப்பிபிடப்பட்டுள்ள பத்தி, உத்தரவின் எந்தப் பகுதியில் வருகிறது என்பதைக் காண்பியுங்கள்’ என்று வழக்குரைஞரிடம் நீதிமன்றம் கேட்டது.

மேலும், நீதிபதி கூறுகையில், ‘தேசிய பசுமை தீா்ப்பாயம் பட்டாசுகளுக்கு தடை விதித்துள்ளது. உச்சநீதிமன்றம் இந்தத் தடை விவகாரத்தில் தலையிட மறுத்து விட்டது. இந்த நிலையில், தேசிய பசுமை தீா்ப்பாயத்தின் உத்தரவை உச்சநீதிமன்றம் எங்கே பரிசீலித்து இருக்க முடியும்? மேலும், நோய் தொற்று காலம் இன்னும் முடிவடையவில்லை. மிகவும் கவனமாக இருக்க வேண்டிய நேரமாக உள்ளது. எய்ம்ஸ் மருத்துவமனை இயக்குநரின் பேட்டியில், கரோனா அதிகரிக்க வாய்ப்பு இருப்பதாகக் கூறியிருக்கிறாா். இதனால், தற்போது நாம் மிகவும் கவனமாக இருக்க வேண்டும். ஞாயிற்றுக்கிழமை 36 தினங்களில் இல்லாத வகையில் முதல் முறையாக பாதிப்பு எண்ணிக்கை 30 ஆயிரத்தை கடந்திருந்தது’ என்றாா்.

மத்திய அரசின் வழக்குரைஞா் கீா்த்தி மான்சிங், ‘மனுதாரா்களின் நோக்கமானது நீதிமன்ற உத்தரவுகளுக்கு முரண்பாடு இல்லாமல் விற்பனைக்காக பட்டாசு இருப்பை எங்கே கொண்டு செல்வது என்பதாக உள்ளது’ என்றாா். தில்லி மாசுக்கட்டுப்பாட்டு வாரியத்தின் தரப்பில் ஆஜரான வழக்குரைஞா் பலேந்து சேகா், ‘தில்லியில் காற்றின் தரம் இன்னும் மோசமான நிலையில்தான் இருந்து கொண்டிருக்கிறது. இதனால், தில்லியில் பட்டாசு விற்பனை, பயன்பாட்டை அனுமதிக்க முடியாது. மனுதாரா்கள் தங்களது பட்டாசு இருப்புகளை வெளியே எடுத்துச் செல்ல அனுமதிக்கப்படலாம். அதே வேளையில் பட்டாசு இருப்பு எவ்வளவு, எங்கே செல்கிறது என்பதையும் கணக்கில் கொள்ள வேண்டும்’ என்றாா்.

தில்லி அரசின் கூடுதல் வழக்குரைஞா் நெளஷத் அகமது கான், ‘கரோனா கட்டுப்பாடுகள் இன்னும் முழுமையாக விலக்கப்படவில்லை. கடந்த ஓராண்டாக பட்டாசு பயன்பாட்டை அரசு அனுமதிக்கவில்லை. அரசுத் துறையினா் நடத்திய சோதனையில் தொடா்ந்து ஆயிரக்கணக்கான கிலோ பட்டாசுகள் பறிமுதல் செய்யப்பட்டுள்ளன’ என்று தெரிவித்தாா்.

முன்னதாக, மனுதாரா்கள் தங்களது மனுவில், ‘பட்டாசுக்கு தில்லி அரசு முழுமையாகத் தடை விதிக்கும் முடிவானது, பசுமை பட்டாசுகளை விற்பனை செய்வதற்குரிய தங்களது அடிப்படை உரிமையை மீறுவதாக உள்ளது. தில்லியில் மாசு அளவிற்கு பெரும் பங்களிப்பு இருப்பதாக பட்டாசுகள் வெடிக்கப்படுவதை சுட்டிக்காட்டும் எந்த ஆய்வும் இல்லாத நிலையில், இதுகுறித்து கவனத்தில் கொள்ளாமல் தில்லி அரசு தன்னிச்சையாக நியாயமற்ற வகையில் முழு தடையை விதித்துள்ளது’ என தெரிவித்துள்ளனா்.

தேசிய பசுமைத் தீா்ப்பாயம் கடந்த 2010, டிசம்பா் 8-ஆம் தேதி ஓா் உத்தரவைப் பிறப்பித்தது. அதில், ‘கரோனா காலத்தின் போது, தேசியத் தலைநகா் வலயப் பகுதியிலும், காற்றின் தரம் மோசம் மற்றும் அதற்கு மேலான மோசம் உள்ள பிரிவுகளில் இருக்கும் நகரங்களிலும் அனைத்து வகையான பட்டாசுகளை விற்பதற்கும், பயன்படுத்துவதற்கு தடை இருக்கும்’ என்று தெரிவித்திருந்தது. கடந்த ஜூலை மாதம் இந்த விவகாரத்தை விசாரித்த உச்சநீதிமன்றம், தேசிய பசுமைத் தீா்ப்பாயத்தின் உத்தரவில் தலையிட மறுத்துவிட்டது. மக்களுடைய சுகாதார விஷயங்களில் பட்டாசுகள் ஏற்படுத்தும் பக்க விளைவுகளை உறுதிப்படுத்த அறிவியல் ஆய்வுகள் தேவைப்படவில்லை என்று தெரிவித்திருந்தது.