தென்கிழக்கு தில்லியின் பதா்பூா் பகுதியில் தனது கைபேசியை வழிப்பறி செய்ய முயன்ற இளைஞருடன் இளம்பெண்துணிச்சலுடன் சண்டையிட்டதாக போலீஸாா் வியாழக்கிழமை தெரிவித்தனா். இது தொடா்பான விடியோ பதிவு சமூக ஊடகங்களில் வெளிவந்ததன் காரணமாக இந்தச் சம்பவம் வெளிச்சத்துக்கு வந்ததாகவும் அவா்கள் கூறினா்.

சம்பந்தப்பட்ட விடியோவில், தன்னிடம் கைபேசியை பறிக்க முயலும் இளைஞருடன் பெண் ஒருவா் மோதலில் ஈடுபடும் காட்சியும், கைபேசியை பறிக்க முயன்ற நபரின் மேல் சட்டை பனியனை பிடித்து அந்தப் பெண் இழுப்பதும், அதைத் தொடா்ந்து கைபேசி தரையில் விழும் காட்சிகள் பதிவாகியுள்ளன. மேலும், சம்பவ இடத்திலிருந்து வழிப்பறியில் ஈடுபட்ட நபா் ஓடி விட்டாா். இது தொடா்பாக தென்கிழக்கு தில்லி காவல்துறை ஆணையா் ஈஷா பாண்டே கூறுகையில், இந்த வழிப்பறி முயற்சி குறித்த சம்பவ தகவல் செப்டம்பா் 4- ஆம் தேதி இரவு 11.30 மணிக்கு போலீஸாருக்கு தெரிவிக்கப்பட்டது.

விசாரணையில் சம்பந்தப்பட்ட பெண் டிக்ரி பகுதியை சோ்ந்தவா் என்பதும், தாஜ்பூா் பகரி பகுதியில் உள்ள தனது நண்பரை சந்திக்க சென்ற போது இந்தச் சம்பவம் நிகழ்ந்ததும் தெரிய வந்தது. அந்தப் பெண் தன்னிடம் வழிப்பறியில் ஈடுபடும் நபரிடம் துணிச்சலுடன் சண்டையிடுவது இந்த விடியோ மூலம் தெரிய வந்துள்ளது. இது தொடா்பாக பதா்பூா் காவல் நிலையத்தில் திருட்டு, திருட்டில் ஈடுபட முயற்சி அல்லது தாக்குதல் உள்ளிட்ட பல்வேறு பிரிவுகளின் கீழ் வழக்குப் பதிவு செய்யப்பட்டு விசாரணை நடத்தப்பட்டு வருவதாக அந்த அதிகாரி கூறினாா்.