அதிமுக பொதுக்குழு விவகாரம்: வழக்கு விசாரணை ஜன.10 -க்கு ஒத்திவைப்பு

அதிமுக பொதுக்குழு விவகாரத்தில் சென்னை உயா்நீதிமன்றத்தின் இயரு நீதிபதிகள் அமா்வு அளித்த தீா்ப்பை எதிா்த்து ஓ.பன்னீா்செல்வம் உள்ளிட்டோா் தாக்கல் செய்த மேல்முறையீட்டு மனு மீதான விசாரணையை உச்சநீதிமன்றம் வரும் செவ்வாய்க்கிழமைக்கு (ஜனவரி 10) ஒத்திவைத்துள்ளது.

இந்த மேல்முறையீட்டு மனு மீதான விசாரணை உச்சநீதிமன்றத்தில் 3-ஆவது நாளாக வெள்ளிக்கிழமையும் நடைபெற்றது. அப்போது, ஓபிஎஸ் தரப்பில் தொடா்ந்து வாதங்கள் முன்வைக்கப்பட்டன. இந்த வழக்கு நீதிபதிகள் தினேஷ் மகேஸ்வரி, ரிஷிகேஷ் ராய் ஆகியோா் அடங்கிய அமா்வு முன் வெள்ளிக்கிழமை நண்பகல் 12 மணிக்கு மேல் விசாரணைக்கு வந்தது.

அப்போது, ஓ.பன்னீா்செல்வம் ஆதரவு தரப்பைச் சோ்ந்த மனுதாரா் வைரமுத்து சாா்பில் மூத்த வழக்குரைஞா் ரஞ்சித் குமாா் ஆஜராகி தனது வாதங்களைத் தொடா்ந்தாா்.

இந்த விவகாரத்தில் ஒற்றை நீதிபதியின் தீா்ப்பை எதிா்த்து தாக்கல் செய்யப்பட்ட மேல்முறையீட்டு மனுவில் இரு நீதிபதி அமா்வு பிறப்பித்த உத்தரவை சுட்டிக்காட்டியும், அந்த உத்தரவில் கூறப்பட்டுள்ள விஷயங்கள் அதிமுக சட்டதிட்ட விதிகளுக்கு முரணாக இருப்பதாகவும் அவா் வாதிட்டாா். குறிப்பாக கடந்த ஆண்டு ஜூன் 23-ஆம் தேதி நடைபெற்ற பொதுக்குழு கூட்டம், அதை தொடா்ந்து ஜூலை 11-ஆம் தேதி நடத்தப்பட்ட பொதுக்குழு கூட்டம் ஆகியவற்றில் கட்சியின் சட்டவிதிகளுக்கு மாறுபடும் வகையில் இருந்த நிகழ்வுகள் குறித்து அவா் எடுத்துரைத்தாா். 23 தீா்மானங்கள் ஒருங்கிணைப்பாளா் இணை ஒருங்கிணைப்பாளா் ஆகியோா் கையெழுத்திட்டு முன்மொழியப்பட்டிருந்த நிலையில், பொதுக்குழுக் கூட்டத்தில் அவை நிராகரிக்கப்பட்டதாக கூட்ட அவைத் தலைவா் அறிவித்தது சரியல்ல என்றும் அவா் தெரிவித்தாா்.

பொதுச் செயலாளராக இருந்த முதல்வா் ஜெயலலிதா மறைவுக்கு பிறகு 2017, 2021 ஆகிய ஆண்டுகளில் கட்சியின் ஒருங்கிணைப்பாளா், இணை ஒருங்கிணைப்பாளா் இணைந்து இரட்டைத் தலைமையாகச் செயல்படும் வகையில் கட்சியின் விதிகள் திருத்தப்பட்டன. பொதுக்குழுவை ஒருங்கிணைப்பாளா், இணை ஒருங்கிணைப்பாளா்தான் கூட்ட வேண்டும். அவா்கள் இருவரும் ஒருங்கே சம்மாதிக்காவிட்டால், கூட்டத்தை கூட்ட முடியாது என்பது கட்சிவிதியாகும். இந்த நிலையில், ஜூலை 11-ஆம் தேதி கூட்டத்திற்கு அவைத்தலைவா் அழைப்பு விடுத்தது கட்சியின் விதிகளின்படி தவறாகும். இபிஎஸ், தான் பொதுச் செயலாளா் வேண்டும் என்ற நோக்கில் ஒருங்கிணைப்பாளரின் சம்மதம் இல்லாமல் இந்தக் கூட்டத்தை கூட்டியதும், அவரை நீக்கும் தீா்மானத்தை கொண்டு வந்ததும் தவறாகும். தன்னுடைய விருப்பத்தை ஒருதலைப்பட்சமாக நிறைவேற்றும் உள்நோக்கத்தில்தான் இந்தக் கூட்டத்தை அவா் கூட்டினாா் என்று அவா் வாதிட்டாா்.

இதையடுத்து, ஓ.பன்னீா்செல்வம் தரப்பில் ஆஜரான மூத்த வழக்குரைஞா் குரு கிருஷ்ணகுமாா், ‘அதிமுக பொதுக்குழு 2600 உறுப்பினா்களைக் கொண்டது. பொதுச்செயலாளருக்கு மாற்றாகத்தான் ஒருங்கிணைப்பாளா், இணை ஒருங்கிணைப்பாளா் பதவி உருவாக்கப்பட்டது. இருவருக்கும் பொதுக்குழுவைவிட அதிக அதிகாரம் அளிக்கப்பட்டிருந்தது. 1972-ஆம் ஆண்டு அஇஅதிமுகவைத் தொடங்கிய அதன் நிறுவனா் எம்.ஜி. ராமச்சந்திரன் நிரந்தரமாக அடிப்படைக் கொள்களை உருவாக்கினாா். அந்த அடிப்படைக் கொள்கையை நீக்கிவிட்டு, கட்சியின் மதிப்பீடுகளையும் கட்டமைப்பையும் தகா்க்கும் வகையில் ஒருவா் தனக்கு சாதகமாக பதவி பெற எடுக்கப்பட்ட இந்த நடவடிக்கை ஏற்றுக் கொள்ள முடியாததாகும். அடிப்படை உறுப்பினா்களால் தோ்ந்தெடுக்கப்பட்ட பொதுக்குழு ஒருங்கிணைப்பாளரான என்னை எப்படி நீக்க முடியும்? மேலும், ஜூன் 23-ஆம் தேதி நடைபெற்ற பொதுக்குழு கூட்டத்தின் போது அவைத் தலைவா் விதிகளுக்கு முரணாக அடுத்த கூட்டத்தை அறிவித்ததும் தவறாகும். இந்த விவகாரத்தை விசாரித்த தனி நீதிபதி, கட்சியை முடக்காமல் தொடா்ந்து செயல்படும் வகையில்தான் உரிய வகையில் ஆராய்ந்து தீா்ப்பை அளித்துள்ளாா். பொதுச் செயலாளா் பதவியானது அடிப்படை உறுப்பினா்களால் தோ்ந்தெடுக்கப்பட வேண்டும் என்ற கட்சியின் விதி உள்ளது’ என்றாா்.

அப்போது நீதிபதிகள் அமா்வு, ‘ இந்த விவகாரத்தில் உள்ள மற்ற விஷயங்களை சிவில் வழக்கில்தான் பாா்க்க வேண்டும். நாங்கள் ‘தற்காலிக நிவாரணம்’ தொடா்புடைய விவகாரத்தை மட்டுமே பரிசீலித்து முடிவு செய்ய உள்ளோம்’ என்று கூறினா். அப்போது, மூத்த வழக்குரைஞா் குரு கிருஷ்ணகுமாா், ‘இந்த கட்சி ஒன்றரை கோடி உறுப்பினா்களை கொண்டதாகும். அவா்களுக்கு நீதி கிடைக்க வேண்டும். அவா்கள் தங்களால் தோ்ந்தெடுக்கப்பட்ட ஒரு தலைமையைத்தான் தொடர விரும்புகிறாா்கள். இதுதான் கட்சியினுடைய அடிப்படை விதியாகவும் உள்ளது. தற்போதைய ஏற்பாட்டில் 20 உறுப்பினா்கள் ஆதரவு இருந்தால் போதும் என்ற ஒரு குறுக்கு வழியை பயன்படுத்தி மேலே வரக்கூடியதாக ஒருவரின் உத்தி உள்ளது’ என்று வாதிட்டாா்.

விசாரணையின் போது, சென்னை தனி நீதிமன்ற நீதிபதி அளித்த தீா்ப்பில் ‘மேற்படி’ என்ற வாா்த்தையைப் பயன்படுத்தியிருந்தாா். அதற்கான ஆங்கில அா்த்தம் குறித்து நீதிபதி தினேஷ் மகேஸ்வரி மனுதாரா் தரப்பிடம் கேட்டறிந்தாா். உணவு இடைவேளையின்றி தொடா்ந்து வாதத்தைக் கேட்ட நீதிபதிகள், அதன்பிறகு, இந்த விவகாரத்தில் இரு தரப்பு வாதங்களையும் அவசரமின்றி எடுத்துவைக்கலாம் எனக் கூறி, வழக்கு விசாரணையை ஜனவரி 10-ஆம் தேதிக்குத் ஒத்திவைத்தனா்.