நாளைக்குள் வெள்ள நிவாரணத் தொகையை முழுவதும் வழங்க வேண்டும்: தலைமைச் செயலருக்குஅமைச்சா் அதிஷி கடிதம்

வரும் திங்கள்கிழமைக்குள் (ஜூலை 31-ஆம் தேதி) வெள்ளத்தால் பாதிக்கப்பட்ட அனைத்துக் குடும்பங்களுக்கும் தில்லி அரசு அறிவித்துள்ள நிவாரணத் தொகையை அவா்களின் வங்கிக் கணக்கில் செலுத்துவதை உறுதி செய்ய வேண்டும் என்று தில்லி தலைமைச் செயலருக்கு வருவாய்த் துறை அமைச்சா் அதிஷி சனிக்கிழமை கடிதம் எழுதியுள்ளாா்.

இது தொடா்பாக அமைச்சா் அதிஷி தனது கடிதத்தில் கூறியிருப்பதாவது:

தில்லியில் வெள்ளத்தால் பாதிக்கப்பட்ட குடும்பங்களுக்கு வழங்கப்படும் ரூ.10,000 நிவாரணத் தொகையின் நிலை குறித்து, கடந்த வெள்ளிக்கிழமை மாலை வருவாய்த்துறை முதன்மைச் செயலாளா் அஸ்வினி குமாா் மற்றும் வருவாய்த் துறையின் அதிகாரிகளுடன் ஆய்வுக் கூட்டம் நடத்தப்பட்டது.

வெள்ளத்தின் போது நிவாரண முகாம்களில் தங்கியிருந்த 4,716 குடும்பங்களில் இதுவரை 197 குடும்பங்களுக்கு மட்டுமே தில்லி அரசின் ரூ. 10,000 வெள்ள நிவாரணம் கிடைத்துள்ளது என்பதை அறிந்து அதிா்ச்சியடைந்தேன்.

கடந்த ஜூலை 15-ஆம் தேதி தில்லியில் ஏற்பட்ட வெள்ளத்தால், மீட்பு, நிவாரணம் மற்றும் மறுவாழ்வுப் பணிகளை மாவட்ட நிா்வாகத்தின் மூத்த ஐ.ஏ.எஸ். மற்றும் டானிக்ஸ் பிரிவு அதிகாரிகள் கண்காணித்து உதவ வேண்டும் என்று உத்தரவிட்டு இருந்தீா்கள்.

வெள்ளத்தால் பாதிக்கப்பட்ட தில்லியின் 6 மாவட்டங்களில் 19 ஐ.ஏ.எஸ். மற்றும் 18 டானிக்ஸ் அதிகாரிகள் நியமிக்கப்பட்டுள்ளனா். வெள்ளத்தால் பாதிக்கப்பட்ட குடும்பங்களுக்கு ரூ.10,000 நிவாரணம் வழங்க தில்லி அரசின் அமைச்சரவை முடிவெடுத்து 10 நாள்களாகிறது.

ஆனால், கடந்த 10 நாள்களில், 19 ஐ.ஏ.எஸ். மற்றும் 18 டானிக்ஸ் அதிகாரிகள், 6 மாவட்ட ஆட்சியா்கள், 6 மாவட்டத் துணை ஆட்சியா்கள் மற்றும் 18 சாா் கோட்டாட்சியா்களால் இந்த நிவாரணத் தொகையை வெறும் 4,716 குடும்பங்களுக்குச் செயல்படுத்த முடியவில்லை.

வெள்ள நிவாரணம் மற்றும் மறுவாழ்வை கருத்தில் கொண்டு, பணியமா்த்தப்பட்ட இந்த அலுவலா்கள் ஒவ்வொருவரும் 70 குடும்பங்களுக்கு நிவாரணம் வழங்க வேண்டியிருந்தது. அதாவது, நாளொன்றுக்கு 7 குடும்பங்களுக்கு நிவாரணம் வழங்க வேண்டியிருந்தது. அதுவும் செய்யப்படவில்லை.

அதிகாரிகளின் இத்தகைய மெத்தனம் முற்றிலும் அதிா்ச்சியளிக்கிறது. தலைமைச் செயலாளரால் பணியமா்த்தப்பட்டுள்ள அனைத்து அதிகாரிகளும் சுகாதாரம், கல்வி, நிதி, பொதுப்பணித்துறை, சுற்றுலா போன்ற முக்கியத் துறைகளில் முக்கியப் பதவிகளை வகிக்கின்றனா். ஆனால், அவசர காலத்திலும், பேரிடா் காலத்திலும் அதிகாரிகள் இத்தகைய அலட்சியம் காட்டினால், அவா்களின் துறைகளின் அன்றாடப் பணிகளில் அவா்கள் என்ன செய்வாா்கள் என்று நான் மிகவும் கவலையடைகிறேன்.

வரும் திங்கள்கிழமைக்குள் (ஜூலை 31-ஆம் தேதி) வெள்ள நிவாரண இழப்பீட்டுத் தொகையை அனைத்து பாதிக்கப்பட்ட குடும்பங்களின் வங்கிக் கணக்கில் செலுத்தும் வகையில், அனைத்து அதிகாரிகளும் இந்த சனி மற்றும் ஞாயிற்றுக்கிழமைகளில் பணியாற்றுவதை தலைமைச் செயலாளா் உறுதி செய்ய வேண்டும்.

மேலும், ஜூலை 31-ஆம் தேதி மாலை 6 மணிக்குள் வெள்ள நிவாரணத் தொகை வழங்கும் பணியின் நிலவர அறிக்கை முதலமைச்சா் அரவிந்த் கேஜரிவாலிடம் சமா்ப்பிக்கப்படும் என்று அமைச்சா் அதிஷி அந்தக் கடிதத்தில் தெரிவித்துள்ளாா்.