திகாரில் விவிஐபி கைதிகளை மிகுந்த எச்சரிக்கையுடன் வைத்திருக்க வேண்டும்: முன்னாள் அதிகாரி

திகாா் சிறையில் விவிஐபி கைதிகள் எப்போதும் தாக்கப்படும் அபாயம் இருப்பதால், அவா்களை மிகவும் எச்சரிக்கையுடன் வைத்திருக்க வேண்டும் என்று சிறைத் துறை டிஜியாகவும் பணியாற்றிய முன்னாள் தில்லி காவல்ஆணையா் நீரஜ் குமாா் கூறினாா்.

தில்லி முதல்வா் அரவிந்த் கேஜரிவால், அவரது முன்னாள் கேபினட் அமைச்சா்கள் சத்யேந்தா் ஜெயின், மனீஷ் சிசோடியா உள்பட பல முக்கிய நபா்கள் திகாா் சிறையில் அடைக்கப்பட்டுள்ளனா்.

இந்நிலையில், முன்னாள் தில்லி காவல்ஆணையா் நீரஜ் குமாா் செய்தி ஏஜென்சிக்கு அளித்த பேட்டியில், தான் திகாா் சிறையில் ஏறக்குறைய ஒன்றரை ஆண்டுகள் பதவியில் இருந்த காலத்தில் அதிகபட்ச எண்ணிக்கையிலான வி.வி.ஐ..பி.க்களை கவனத்துக் கொள்ளும் பாக்கியம் தனக்கு இருந்தது என்று தெரிவித்துள்ளாா்.

அவரது பதவிக் காலத்தில், மிகவும் பிரபலமான காவல் துறை அதிகாரிகளில் ஒருவராக இருந்த நீரஜ் குமாா், தில்லியில் பணியாற்றுவதில் உள்ள அழுத்தங்கள் குறித்து கூறியதாவது: அதிகபட்ச வி.வி.ஐ.பி.க்களை கவனித்துக் கொள்ளும் தனி பாக்கியம் எனக்கு இருந்தது. காமன்வெல்த் விளையாட்டு ஊழல் நடந்த நேரம் அது. சுரேஷ் கல்மாடி, கனிமொழி, ஏ ராஜா (2ஜி ஸ்பெக்ட்ரம் ஊழல்), ரிலையன்ஸை சோ்ந்தவா்கள், சிடபிள்யூஜி, அமா் சிங் போன்றவா்கள் இருந்தனா்.

அவா்கள் நன்றாக நடந்து கொள்கிறாா்களா என்று கேட்கிறீா்கள். ஆனால், அவ்வாறு இல்லை. அவா்கள் ஒரு பெரிய தொல்லையாக இருந்தாா்கள். ஒரு விஐபி தங்கும் போது, அந்த நபரை தங்க வைப்பதில் மிகுந்த கவனம் செலுத்தப்படுகிறது. துரதிருஷ்டவசமாக அல்லது அதிா்ஷ்டவசமாக கேஜரிவால் உள்ளே இருக்கிறாா். அவா் எந்த ஒரு பாராக் அல்லது எந்த அறையிலும் வைக்கப்பட மாட்டாா். மேலும், பாதுகாப்புடன் மிகவும் கவனமாக தோ்ந்தெடுக்கப்பட்ட இடத்தில் வைக்கப்படுவாா்.

ஏனென்றால், ‘பிளேட்பாசி’ போன்ற நிறைய விஷயங்கள் நடக்கலாம். நீங்கள் கவனித்துக் கொள்ளாவிட்டால், அவா் தாக்கப்படலாம். கேஜரிவால் குற்றவாளிகள் சிறையில் அடைக்கப்பட்டுள்ளதை ஊடக அறிக்கைகள் மூலம் அறிந்தேன். விசாரணைக் கைதிகளை விட மிகவும் பாதுகாப்பான மற்றும் அமைதியான இடத்தில் அவா் வைக்கப்பட்டுள்ளாா். குற்றவாளிகளின் விஷயத்தில் அவா்கள் தங்கள் வாழ்நாள் முழுவதையும் அங்கேயே கழிக்க வேண்டும் என்பது அவா்களுக்குத் தெரியும்.

உள்ளூா் அரசியல்வாதிகளின் அழுத்தம் இல்லாததால், தில்லி காவல்துறை ஆசீா்வதிக்கப்பட்டுள்ளது. தில்லி காவல் துறை மத்திய அரசின் கட்டுப்பாட்டில் வருவதால், அந்த அளவிற்கு, நாங்கள் சுதந்திரமாக இருக்கிறோம். இருப்பினும், வேறு எந்த மாநிலத்துடனும் ஒப்பிட முடியாத அழுத்தம் உள்ளது. நாட்டின் எந்தப் பகுதியிலும் எந்தப் பிரச்னை ஏற்பட்டாலும், மக்கள் தில்லிக்கு வந்து விடுகின்றனா். உதாரணமாக. விவசாயிகள் போராட்டத்தைச் சொல்லலாம். தில்லியில் அதன் விளைவை கண்டு இருப்பீா்கள்.

சட்டம் ஒழுங்கு கண்ணோட்டத்தில், புது தில்லி மாவட்டம் மிகவும் கடினமானது. வெளி மாவட்டங்கள் குறைவான சவாலை சந்திக்கின்றன. ஆனால், வெளிப் பகுதிகளில் குற்றத்தின் அழுத்தம் உள்ளது. குறிப்பாக தெருக் குற்றங்களைச் சொல்லலாம் என்றாா் நீரஜ் குமாா்.