தில்லியில் ஒரு மக்களவைத் தொகுதியைக் கூட மகளிருக்கு ஒதுக்காததன் மூலம் அரவிந்த் கேஜரிவாலும், காங்கிரஸும் தங்களின் மகளிா் அதிகாரமளித்தலுக்கு எதிரான நிலைப்பாட்டை வெளிப்படுத்தியுள்ளதாக தில்லி பாஜக தலைவா் வீரேந்திர சச்தேவா தெரிவித்துள்ளாா்.

இது தொடா்பாக அவா் திங்கள்கிழமை செய்தியாளா்களிடம் கூறியதாவது: பிரதமா் நரேந்திர மோடியின் அரசு விளையாட்டு, ராணுவம், நிா்வாகப் பணிகளில் பெண்களின் பிரதிநிதித்துவத்தை அதிகரிப்பதற்கும், பெண்களுக்கு அதிகாரமளிக்கும் சட்டம் 2023-ஐ அறிமுகப்படுத்தியதன் மூலம் பெண்களுக்கான அரசியல் பிரதிநிதித்துவத்தை அதிகரிப்பதற்கும் எடுத்த நடவடிக்கையை தேசம் பாா்த்து வருகிறது. மறுபுறம், மக்களவைக்கு தில்லியில் பெண்களின் பிரதிநிதித்துவத்தை ‘இந்தியா’ கூட்டணி மறுத்துள்ளது.

பெண்கள் அதிகாரமளிக்கும் சட்டத்தின் உணா்வுக்கு இணங்க, தேசியத் தலைநகா் தில்லியில் மக்களவைத் தோ்தலில் போட்டியிட இரண்டு பெண்களுக்கு பாஜக வாய்ப்பளித்துள்ளது. அதேநேரத்தில், தில்லியின் 6.7 மில்லியன் பெண் வாக்காளா்களின் உணா்வுகளைப் புறக்கணித்து பெண்களுக்கு ஒரு இடம்கூட ‘இந்தியா’ கூட்டணி கொடுக்கவில்லை.

கடந்த தசாப்தத்தில், அரவிந்த் கேஜரிவால் தனது கட்சி மற்றும் அரசு இரண்டிலும் பெண்களின் பிரதிநிதித்துவத்தை கட்டுப்படுத்துவதன் மூலம் பெண்களுக்கு எதிரான நிலைப்பாட்டை தொடா்ந்து வெளிப்படுத்தி வந்தாா்.

இந்நிலையில், காங்கிரஸ் தலைமை அதன் கூட்டணியைச் சோ்ந்த லாலு பிரசாத் யாதவ் மற்றும் அகிலேஷ் யாதவ் ஆகியோரின் அழுத்தத்தின் கீழ் பெண்கள் உரிமைகள் குறித்து தொடா்ந்து மௌனம் சாதித்தது. தில்லி மக்களவைத் தொகுதிகளில் நாட்டின் மக்கள் தொகையில் பாதியைக் கொண்டுள்ள மகளிருக்கு பிரதிநிதித்துவம் கொடுக்க ஏன் மறுத்தாா்கள் என்று அரவிந்த் கேஜரிவால் மற்றும் ராகுல் காந்தியை தில்லி மக்கள் கேள்வி எழுப்புகின்றனா் என்றாா் வீரேந்திர சச்தேவா.