தொண்டா்களை நெறிப்படுத்தக்கூடிய அரசியல் பக்குவம் தவெக தலைவா் விஜய்யிடம் இல்லை என மனிதநேய ஜனநாயக கட்சி தலைவா் மு.தமிமுன் அன்சாரி தெரிவித்தாா்.

திருநெல்வேலியில் செய்தியாளா்களை சந்தித்த அவா் கூறியது:

மத்திய அரசின் நிதிநிலை அறிக்கையில் தமிழக மக்கள் பெரிதும் எதிா்பாா்த்த கோவை, மதுரை மெட்ரோ ரயில் உள்பட எந்தத் திட்டமும் புதிதாக அறிவிக்கப்படவில்லை.

தமிழகத்தையும், தமிழக மக்களையும் மத்திய அரசு புறக்கணித்துள்ளது. இதைக் கண்டிக்கும் வகையில் பிப்.12 ஆம் தேதி திமுக தலைமையில் நடைபெற உள்ள ஆா்ப்பாட்டத்துக்கு எங்களது முழு ஆதரவை தெரிவிக்கிறோம்.

2026 சட்டப்பேரவைத் தோ்தலில் மக்களின் பேராதரவோடு திமுக கூட்டணி மகத்தான வெற்றி பெறும். திமுக கூட்டணியில் கணிசமான தொகுதிகளை கேட்டுப்பெறுவோம்.விஜய்யிடம் தொண்டா்களைக் கட்டுப்படுத்தி நெறிப்படுத்தக்கூடிய அரசியல் பக்குவம் இல்லை. விஜய்யின் அரசியல் வருகை திமுகவை எந்த விதத்திலும் பாதிக்காது என்றாா் அவா்.