இருளப்பபுரம் பசுபதீஸ்வரர் கோயில் சித்திரை திருவிழா நாளை தொடக்கம்

நாகர்கோவில் இருளப்பபுரம் பசுபதீஸ்வரர் - பிரசன்னபார்வதி அம்மன் திருக்கோயில் சித்திரை திருவிழா வெள்ளிக்கிழமை (ஏப். 20 )  கொடியேற்றத்துடன் தொடங்குகிறது.
இதையொட்டி, கோயிலில் காலை 4.30 மணி முதல் 6  மணி வரை திருப்பள்ளி எழுச்சியும், 6 மணி முதல் 7.30 ம ணி வரை தேவார பஜனை நிகழ்ச்சியும், 9 மணிக்கு திருக்கொடியேற்றம் நிகழ்ச்சியும் நடைபெறுகிறது. மாலை 6.30  மணிக்கு இருளப்பபுரம் சிவசக்தி மகளிர் மன்றத்தாரின் 1,008  திருவிளக்கு பூஜை வழிபாடு நடைபெறுகிறது.  2 ஆம் திருவிழா சனிக்கிழமை (ஏப். 21)  காலை 7 மணிக்கு முருகப் பெருமானுக்கு சஷ்டி அபிஷேகம், 8.30  மணிக்கு திருவாதிரை திருவிழா அருள்மிகு நடராஜ மூர்த்தி, சிவகாமி அம்பாளுக்கு சிறப்பு அபிஷேகம், தொடர்ந்து  வாகனத்தில் திருவீதி உலா வருதல் ஆகியவை நடைபெறுகின்றன. 
ஏப். 24இல் காலை 9  மணிக்கு திருவெம்பாவை அபிஷேகமும்,  பிற்பகல் 3  மணிக்கு துர்கா பூஜையும், இரவு 7  மணிக்கு சிவதேவஸ்தான சிவசக்தி மகளிர் மன்ற மாநாடும் நடைபெறுகிறது. 
ஏப். 25 ஆம் தேதி  இரவு 7  மணிக்கு 63 ஆவது இந்து சமய மாநாடு  நடைபெறுகிறது.  ஏப். 26  ஆம் தேதி இரவு 7 மணிக்கு அருள்மிகு பிரசன்ன பார்வதி சமேத பசுபதீஸ்வரருக்கு திருக்கல்யாண நிகழ்ச்சி நடைபெறுகிறது. தொடர்ந்து, இரவு 8 மணிக்கு பஞ்சமூர்த்திகள் வீதி உலா நிகழ்ச்சியும் நடைபெறும். 
விழா ஏற்பாடுகளை சிவதேவஸ்தான நிர்வாகக்குழுத் தலைவர் வழக்குரைஞர் டி. உதயகுமார், துணைத் தலைவர்கள் கிருஷ்ணபெருமாள், பாலகிருஷ்ணன், பரசுராம் செயலாளர் ராஜகுமார் மற்றும் நிர்வாகக்குழு உறுப்பினர்கள் செய்து வருகின்றனர்.