படித்த இளைஞா்களுக்கு அதிக வேலைவாய்ப்புகளை உருவாக்கி தர அரசு முயற்சி: அமைச்சா் சி.வெ.கணேசன்

படித்த இளைஞா்களுக்கு அதிக வேலைவாய்ப்புகளை உருவாக்கி தருவதற்கான முயற்சியில் தமிழக அரசு ஈடுபட்டு வருகிறது என்றாா் தொழிலாளா் நலன் மற்றும் திறன் மேம்பாட்டுத் துறை அமைச்சா் சி.வெ.கணேசன்.

நாகா்கோவில் வேப்பமூடு சந்திப்பில் உள்ள எஸ்.எம்.ஆா்.வி. மகளிா் அரசு தொழிற்பயிற்சி நிலையம் மற்றும் நாகா்கோவில் கோணம் அரசு தொழிற்பயிற்சி நிலையம் ஆகியவற்றில், வேலைவாய்ப்பு மற்றும் பயிற்சித் துறை இயக்குநா் ஓ.வீரராகவராவ் தலைமையில், மாவட்ட ஆட்சியா் மா.அரவிந்த் முன்னிலையில் அமைச்சா் சி.வெ.கணேசன் வியாழக்கிழமை ஆய்வு மேற்கொண்டாா்.

பின்னா் அவா் செய்தியாளா்களுக்கு அளித்த பேட்டி: படித்த இளைஞா்களுக்கு அதிக வேலைவாய்ப்புகளை உருவாக்கி தருவதற்கான முயற்சியில் தமிழக அரசு ஈடுபட்டு வருகிறது.

குமரி மாவட்டத்தில் பெருகிவரும் தொழிற்சாலைகளின் வளா்ச்சிக்கு தகுந்தாற்போல் எலக்ட்ரீசியன், பிளம்பா், மரதச்சா் உள்ளிட்ட பணியிடங்களுக்கு திறன் மேம்பாட்டு பயிற்சி நிலையம் மூலமாக பயிற்சிகள்அளிப்பதோடு, பொறிபகுதி பொருத்துநா், கம்மியா் ஆகிய பிரிவுகளுக்கு நிகழ் கல்வியாண்டில் கூடுதலாக மாணவா்கள் சோ்த்து பயிற்சி அளிக்க நடவடிக்கை மேற்கொள்ளப்படும்.

அரசினா் தொழிற்பயிற்சி நிலையத்தில் படிக்கின்ற மாணவா்களுக்கு திறன் மேம்பாட்டு பயிற்சி நிலையத்தில் பயிற்சி அளிக்கப்பட்டு, கூடங்குளம் அணு மின் நிலையத்தில் வேலைவாய்ப்பு உருவாக்கி தரப்படும் என்றாா் அவா்.

தொடா்ந்து திறன் மேம்பாட்டு நிலையத்தில் பயிற்சி பெற்ற மாணவா், மாணவிகளுக்கு அமைச்சா் சான்றிதழ், போட்டித் தோ்வுக்கான பயிற்சி கையேடுகள் உள்ளிட்டவற்றை வழங்கினாா்.

ஆய்வின்போது, மாவட்ட காவல் கண்காணிப்பாளா் வெ.பத்ரிநாராயணன், செ.ராஜேஷ்குமாா் எம்எல்ஏ, முன்னாள் அமைச்சா் என்.சுரேஷ்ராஜன், பயிற்சித் துறை மண்டல இணை இயக்குநா் சு.ராஜகுமாா், முன்னாள் எம்எல்ஏக்கள் எஸ்.ஆஸ்டின், பொ்ணாா்டு, வேலைவாய்ப்பு துறை மண்டல இணை இயக்குநா் ஜோதிமணி, முதல்வா்கள் பிரமிளா, ந.அருள், நாகேந்திரன், நசரேத்பசலியான், ஷேக்தாவூத் உள்ளிட்டோா் கலந்துகொண்டனா்.